Спорт – со тазалык

Башкортостанын спортэз азинтон вылысь трос ужъёс быдэстӥсько. Тазалыко улонэн эшъяськисьёсты республика но ёрос ужрадъёс огазеяло. Физкультура, спорт егитъёсты визьноданын но инъет луэ. Уго егитъёс – асьмелэн вуономы, соослэсь утёз шаермылэн азьпал улонэз.

Татышлы ёросын но спортлы бадӟым саклык висъяське. Ёросысь спортъя но егитъёслэн политиказыя ёзэтлэн кичӧлтэмезъя, татын трос спорт ужрадъёс, конкурсъёс ортчо. Туэ алясь висёнэн сэрен тросэз ӵошатсконъёс мукет дыре выжтӥськизы ке но, тазалыко улонэн эшъяськисьёс онлайн амалэн ортчись ужрадъёсы но пыриськыны мылкыд каризы.

Физкультурникъёслэн нуналзы азьын Вылысь Татышлыын ёросысь спортсменъёсты, спортэз гажасьёсты, тазалыко улонлы бадӟым саклык висъясьёсты ӟечкылан ужрад ортчиз. Ёросын спортэз азинтонэ трос кужымзэс понэмъёс пӧлын луизы Кызыл-Ярысь Леонид Шайдуллин но Улысь Балтачысь Юлия но Алик Кайрановъёслэн семьязы.

Кылсярысь, Кайрановъёс Татышлы ёросын ялэм «Семья и ЗОЖ» спорт праздниклэн гужем этапаз (со онлайн форматэн ортчиз) вормисе потӥзы. Ӟечкыласьком!

Тодады вайытӥськом, январь толэзьын Уфаын «Здоровое поколение – сильный регион» проект улсын «Новогодние семейные игры - 2020» фестиваль ортчиз. Отын Татышлы ёрос понна ӵошатскизы Улысь Балтачысь Кайрановъёс.

Фото: https://vk.com/club171050088?z=photo-171050088_457240524%2Fwall-171050088_417