«Мон кадь лэсьты, мынэсьтым ӟечгес быдэсты»

Пичиысен спортэн
эшъяськем
Василий Захарович Кипчакын вордӥськем. Татын ик ортчем солэн шудо пичи дырыз. Аръёс ортчыса но со вордскем палъёсызлэсь палэнэ кошкымтэ: улон сюрессэ яратоно гуртаз азинтэ.
В. З. Садритдинов пичиысен спортэн тунсыкъяськем. Со, Кипчак школаын дышетскыкуз, быдэсак спорт дуннее выем, шуыны луоз. «Спортэз яратыны дышетӥз физкультурая дышетӥсьмы Альберт Максимович Магусумов. Жаляса верано, али со пӧламы ӧвӧл ни. Альберт Максимовичен кыӵе гинэ ӵошатсконъёсы ӧм вуылэ. Волейболын, баскетболын, куасэн ӵошатсконын, капчи атлетикаын котьку вылӥ лыдпусъёс возьматъямы. Со ас ужзэ ӟеч, тодыса быдэсъя вал. Мон солы пумтэм тау кылъёсме верасько», - вера Василий Захарович.
Быдэсмем малпан
«Альберт Максимович физкультурая урокъёсты нуыны кутскиз но, мынам йырам малпан вордӥськиз – одно ик Пермьысь педучилищее дышетскыны пыроно. Отын кужмо физрукъёсты дасяло вал», - вера В. Садритдинов. Малпанзэ быдэстон понна Василий Захаровичлы трос тыршоно луэм. Солэн спортлы сӥзьымтэ нуналыз ик луымтэ. Физкультурая урокъёсын зол быгатонлыкъёссэ возьматон сяна, урокъёс бере тренировкаосы ветлэм. Тыршемез юнме луымтэ. «Пермьысь педучилищее дышетскыны пыри. Зэм, школа бере армие мынӥ, служба бере, 1983-1985-тӥ аръёсын, педучилищеын дышетски. Спортэн эшъяськеме армиын но туж юрттӥз», - вера пограничной войскоосын службазэ ортчем В. Садритдинов.
Педучилищеын тодон-валан басьтыкуз Василий Захарович трос ӵошатсконъёсы пыриськем, олимпи чемпионъёсын но бызьылэм. Дышетӥсьёссэ, тренеръёссэ Василий Захарович туннэ но шуныт тодэ ваёнъёсаз возе. Малпанъёсыныз дышетскем аръёсаз ӵем берытске.
Быръем удысын –
куамын вить ар
1986-тӥ арысен Василий Захарович Кипчак школаын дышетэ. Со ужаны кутскем нуналъёссэ туннэ кадь тодэ. «Физкультурая урокъёс сяна, ДЮСШ-лэсь «лыжные гонки» ӧр сётӥзы: урокъёс бере нылпиос куасэн ветлонъя кружоке ветлӥзы. Пиналъёс туж тыршисесь вал. Куинь толэзьскын ӵошатсконъёсы пыриськыса, вормисе потӥм. Дас арлы матэ куас сюресын ёросамы милемлы вуисьёс ӧз луэ», - вера Василий Захарович.
Улон интыяз гинэ уг сылы. Куддыр шуг-секытъёсын но пумиськоно луэ. «Куасэн секытлыкъёс кылдӥзы. Соин дзюдое выжоно кариськи. Зэм, татын матъёс уг тырмо вал, малы ке шуоно кружоке 40 нылпи ветлӥз», - тодаз вае дышетӥсь. Ӝыны арскын Кипчак школаысь пиналъёс ёрос ӵошатсконъёсы пыриськыны кутскиллям. Кема дыр но ортчымтэ, нылъёслэн но пиослэн командаоссы быдэсросси ӵошатсконъёсысь вормонъёсын бертылӥллям. Кӧня ке ар ӵоже соос нырысетӥ интыосты нокинлы сётӥллямтэ. Нылъёс но пиос Чайковскийын, Воткинскын, Пермьын ортчись ӵошатсконъёсы олокӧня пол вуылӥллям, котьку вормонъёсын бертылӥллям.
Нылпиос анай-атайёслэсь адӟем каро
«Дыр вуиз волейболэ выжыны. Ма бордысен ужез азинтоно?» - ас понназ малпаськыны кутскем Василий Захарович. Котькуд дышетӥсьлэн аслаз ужан амалъёсыз вань уго. В. З. Садритдинов нырысь ик гуртын улӥсьёслэсь командаоссэс кылдытэм. «Ӝыт тренировкаосы лыктыкузы, шудӥсьёслы верасько вал, нылпиоссэс но сьӧразы мед ваёзы шуыса. Спортзалын анай-атайёс шудо, нош пичиос соослэсь шудэмзэс учко, эскеро. Озьы соос шудонэн тунсыкъяськыны кутско. Нылпиослэн но волейболэн шудыны мылкыдзы кылдэ. Нылпи анайлэсь но атайлэсь адӟем карыса будэ», - ужысьтыз одӥгзэ секретсэ усьтыса вера Василий Захарович. Физкультурая дышетӥсь старшей, средней но младшей группаосын ужаны кутскем. Солэн дышетоно пиналъёсыз асьсэлэн возрастной группаосазы ёросын вормисьёс пӧлын лыдъяськиллям.
«Мон кадь лэсьты…»
Школаын дышетскисьёсын сяна, Василий Захарович Кипчак гуртысь командаосын но трос ӵошатсконъёсы вуылэм. Солэн кылъёсызъя, спортэз азинтонын, эшлыко кусыпъёсты юнматонын Башкортостанысь удмуртъёслэн НКЦ-зылэн кубокез понна волейболъя ӵошатсконъёс но бадӟым инты басьто. Со ӵошатсконъёсы кипчакъёс арлы быдэ сямен пырисько, волейболын кужмо луэмзэс возьмато.
«Мынам девизэ - мон кадь лэсьты, мынэсьтым ӟечгес быдэсты, - шуэ В. Садритдинов. – Нылпиослы нырысь аслэсьтыд быгатонлыкъёстэ возьматоно. Собере гинэ соос азе куронъёс пуктоно. Азьло ужаны капчигес вал, школаямы трос нылпиос дышетскизы. Али пиналъёс ӧжыт. Пӧртэм классъёсын дышетскисьёсты одӥг командае люкано луэ».
Василий Захаровичлэн трос дырыз школаын ортче. Шутэтскон нуналъёсы со ӵем дыръя ӵошатсконъёсы мынэ. «Бадӟым тау кузпалылы Евгения Валентиновналы, Валентина но Татьяна нылъёсылы. Соос котьку монэ валаны тыршизы, выль вормонъёсы бурдъяллязы», - вера В. Садритдинов.
- Тӥ понна ма со ӵошатскон? – юасько Василий Захаровичлэсь.
- Ӵошатскон – со ваньмыз, мар понна тон ужад, мар понна тон лулдэ сётыны дась, мар понна тон уй-нунал сюлмаськиськод, - вера дышетӥсь.
Школаын ужатозяз Василий Захаровичлы ужан ӧръёссэ вошъяно луэм ке но, со огез сярысь но уг жаля. Спортлэсь котькыӵе ӧрзэ мед быръёз, ужзэ со тыршыса, сюлэмзэ но лулзэ поныса быдэсъя. Соин ик котькуд ужезлэн емышъёсыз шумпотымон луо. Туннэ Кипчак школаысь пиослэн волейболъя командазы – Куеда ёрослэн чемпионэз.
Миляуша БУЛАТОВА.
Туспуктэмез Алексей
САМИРЗЯНОВЛЭН.