-11 °С
Салкым
Антитеррор
Вань иворъёс
Спорт
12 февраль 2020, 15:45

Спортэн эшъяськыны ноку бер ӧвӧл

Шаерамы "Лыжня России" ӵошатскон ортчиз

Тулыспал толэзьлэн кыкетӥ кӧснуналаз быдэс шаер куас вылэ султӥз, шуыны луоз. «Лыжня России» ӵошатскон городъёсын но ёросъёсын ортчиз. Со Быдӟым Вормонлы 75 ар тырмонлы сӥземын вал. Ӵошатсконэ котькуд мылкыд карись адями пыриськыны быгатӥз. Спортъя ужрад пичиосты, егитъёсты, бадӟымъёсты но арлыдоосты огазеяз. Башкортостанын улӥсьёс но куасэн ӵошатсконлэсь палэнэ ӧз кыле.
Республикалэн шоркараз
Уфаын ортчем «Лыжня России», республикаысь Спортъя но егитъёслэн политиказыя министерстволэн ивортэмезъя, дас сюрслэсь трос тазалыко улонэн эшъяськисьёсты огинэ люказ. Куас сюрес вылэ потӥзы РФ-ысь спортъя министрлэн воштӥсез Марина Томилова, БР-лэн Тӧроезлэн администрациеныз кивалтӥсь Александр Сидякин, вице-премьер Ирек Сагитов, БР-ысь спортъя но егитъёслэн политиказыя министр Руслан Хабибов, общественной огазеяськонъёсын кивалтӥсьёс, депутатъёс, куасчиос но мукетъёс. Чылкыт омырын ӵошатскон ваньзылы задор мылкыд кузьмаз, мукет спорт ужрадъёсы пыриськыны бурдъяз.
Бурай ёросын
Бурай ёросын куасэн бызьылонэз азинтонлы бадӟым саклык висъяське. Татысь спортсменъёс зонаын ортчись, республика ӵошатсконъёсы ӵем пырисько, вормонъёсын берто. «Лыжня России» ӵошатсконэ но бурайёс мылысь-кыдысь потӥзы. Кык сюлэсь трос куасчиос пӧлын Бурай ёрос администрациен кивалтӥсь Рустам Исхаков но луиз. Куасэн ӵошатсконэ ёросысь школаосын дышетскисьёс но пыриськизы. Ваныш-Алпаутово школаын дышетскисьёс ваньзы сямен куас сюрес вылэ потэменызы висъяськизы. Абсолютной чемпионъёс велосипедъёслы кузё луизы.
Вераны кулэ, Бурайысь кыкетӥ номеро гимназиын дышетскись агай-сузэръёслэн Родион но Диана Раяновъёслэн куас сюрес вылын утэм вормонъёссы сярысь ӵем кылыны луэ. Спортлэн та видэныз соос пичиысен тунсыкъясько. «Лыжня России» ӵошатсконэ но Раяновъёс шумпотыса потӥзы, 6-11-тӥ классъёс пӧлын финише нырысетӥен пыризы. Ӵуказеяз Дианаен Родион Бурай ёрослэн командаеныз ӵош Бирскын ортчем «Лыжня России» ужрадэ но вуылӥзы. Бирск, Кушнаренко, Мишкино ёросъёсысь куасчиос пӧлын усто быгатонлыкъёссэс возьматӥзы, кыксы ик ӵошатсконысь кыкетӥ интыен бертӥзы.
Татышлы ёросын
Татышлы ёросын ортчем «Лыжня России» ёросысь 16 командаосты огазеяз. Куас сюресын кужымзэс мертазы организациослэн, предприятиослэн но гурт поселениослэн командаоссы. Организациос, предприятиос пӧлын вормисе потӥз культурая управленилэн командаез. Гурт поселениос пӧлын ваньзылэсь кужмо луизы улысь балтачъёс. Кыкетӥ интыын – Выль Татышлы гурт поселенилэн командаез, куинетӥ – Кальтяево гурт поселенилэн куасчиосыз. Ӵошатсконэ пыриськон сяна, калык понна ГТО-лэсь «Бег на лыжах» тестсэ сётыны луонлыкъёс но кылдытэмын вал.
Янаул ёросын
Янаул ёросын «Лыжня России» ӵошатсконэ 800-лэсь трос адями пыриськиз (тужгес пичиезлы куасчилы ньыль арес, тужгес арлыдоезлы – 88 арес). Татын куас сюреслэсь кузьдалазэ кык пӧртэм лэсьтӥллям: Быдӟым Вормонлы сӥзьыса 1945 метр но 1000 метр. Та нуналэ ик мылкыд карисьёс ГТО-лэсь нормативъёссэ но сётыны быгатӥзы.
***
Ӵошатскон адямиослэсь тазалыко улонэз быръемзэс яркыт возьматӥз. Та нуналэ куас сюресэ султэмъёс доразы одӥг малпанэн бертӥзы: «Спортэн эшъяськыны ноку бер ӧвӧл».
Читайте нас в