Ӵошатсконъёсын вормонэзлы оске

Владислав Шараев капчи атлетикаен школаын дышетскыкуз ик тунсыкъяськыны кутскем. «Спортэн физкультурая дышетӥселы луыса эшъяськи», - вера со. Со вакытэ Шудекысь пиналъёслы физкультурая урокъёссэс Александр Сергеевич Зайдуллин нуэм. «Урокъёс бере бызьылӥм, куасэн ветлӥм, волейболэн, баскетболэн шудӥм», - тодаз вае Владислав Ирнусович. Школаын тунсыкъяськонъёсыз ик сое берло Ижевскысь кун технической университетлэн А. И. Тихонов нимо физической культурая но спортъя институтаз вуттӥллям. Зэм, татын спортлэн пӧртэм видъёсыз пӧлысь со бызьылонэз сюлэмызъя карем. Владислав студент аръёсаз ик пӧртэм ӵошатсконъёсы кышкатэк пыриськем. Кылсярысь, 2016-тӥ арын со Ростов-на-Донуын бызьылэм. Отын Студентъёслэн быдэсросси форумзы ортчем. Вераны кулэ, Владислав Ирнусовичлэн туннэ гадь бордаз чилясь медальёсыз пӧлысь тросэз студент аръёсаз, солдат улонэз веръямезлэсь азьвыл басьтэмын. «Мон пӧртэм ӵошатсконъёсы вуылӥ ни, - гожтэ Владислав Шараев, медальёсыз пумысен паймемме шӧдыса. – Нош мон понна тужгес дуно луо Башкортостанлэн чемпионатэз, Казанской марафон, Уфаын ортчем калыккуспо марафон». Башкортостанлэн чемпионатаз со куинетӥ интыын луэм, казанской марафонын 1300 спортсменъёс пӧлын финише 13-тӥ вуэм.

Владислав Шараев ӵошатсконъёсы аслаз кужмызлы оскыса пыриське. Табере со Шудекысь пиналъёслы таӵе мылкыд пыӵатон сярысь сюлмаське. Армиысь бертыса, ужез борды со выль кужмын кутскиз. Нош кылем арын егит ӧнерчиез спортэз азинтонэ бадӟым кужым пыртэмез понна Башкортостан Республикалэн Данъян грамотаеныз пусйизы.