"Нефтекамский лыжный гандикап" сярысь кылэмды вань-а?

Туэ ӵошатскон 18-тӥ толшоре ортчиз. Отчы Башкортостанысь, Пермь шаерысь, Татарстанысь, Удмурт Республикаысь 116 спортсменъёс пыриськизы. Соос пӧлысь 27-ез – спортъя мастеръёс, 22-ез – спортъя мастере кандидатъёс.

«Куасэн ӵошатсконэ Ижевскысь вить полэс дунне чемпион (30 аресозь) Валерий Мусалимов но пыриськиз, - вера Нефтекамскысь тодмо куасчи Валерий Гарейшин. – Пиосмуртъёс пӧлын вормисе потӥз Ижевскысь спортъя мастер Пётр Трефилов. Нош нылкышноос пӧлын котькинлэсь кужмо луиз Нефтекамскысь спортъя мастер Анфиса Давлетшина. Кузьымъёс бадӟымесь вал: телевизор, пылесос, микроволновка, мультиварка но мукет. Дас вить пиосмуртъёс но дас вить нылкышноос кузьымъёс басьтӥзы».

Валерий но Фидрат агай-вынъёс Бурай ёросысь Байшады гуртын вордскыса будӥллям. Дышетскыны бускель гуртэ ветлӥллям. Укмыс иськемез соос толалтэ куасэн ортчылӥллям, нош тулыс но сӥзьыл – пыдын. Со дырысен ик, вылды, соос спорт борды кыстӥськиллям. Вераны кулэ, Валерий Гарейшин капчи атлетикая ӵошатсконъёсын но вормисьёс пӧлын лыдъяське.

Фидрат Гарайшин куасэн бызьылонын Россилэн сборной командаяз чемпион луэм. 2004-тӥ арын Канадаын ортчем ӵошатсконын ветеранъёс пӧлын (10 иськем но 15 иськем дистанциосын) «серебряный призёр» нимлы кузё луэм. Солы сӥзьыса, Нефтекамскын арлы быдэ куасэн ӵошатскон ортче.

Фото:https://vk.com/albums-159175079