Вязовкаын мотоблокен биатлон ортчиз

Татышлы ёросысь Вязовкаын аспӧртэм биатлон ортчиз. Отчы пиосмуртъёс одӥг иськем но ӝыны сюресэз мотоблокен ортчизы. Таӵе биатлон туэ нырысьсэ ке но радъяськиз, отчы пыриськыны мылкыд карисьёс трос луизы. Стартэ сизьым мотоблок султӥз. Соос сьӧры пуксизы Владимир Туктамышев, Владислав Мустафин, Кирилл Хатипов, Руслан Нуриахметов, Игорь Нигаматьянов, Руслан Рахматуллин но Вячеслав Марданов.

«Пиос кык пол султыса ыбылӥськизы, - вера ӵошатсконэз радъясь, интыысь культура юртэн кивалтӥсь Фанил Нуриахметов. – Котькудаз ыбылӥськонын соослы куинь патрон сётӥськиз. Со сяна, кык – запасной».