«Ошмеслэн» кубокез - кужмоос киын

Арлы быдэ тулыспал толэзе «Ошмес» газетлэн кубокезлы волейболъя ӵошатскон радъяське. Со тазалыко улонэн эшъяськыны юрттэ, газетлы гожтӥськон мылкыд кылдытэ.

Ужрадэ пӧртэм ёросъёсысь удмурт школаос пырисько. Туэ ӵошатскон 17-тӥ тулыспалэ ортчиз. Ӵошатсконэ Калтасы ёросысь Бадӟым Качак школаысь нылъёслэн (тренерзы Г. Ю. Тимирбаев), Татышлы ёросысь Улысь Балтач но Выль Татышлы школаосысь нылъёслэн но пиослэн (тренеръёссы Ю. В. Губаев но А. И. Сабанчин), Янаул ёросысь Вуж Варяш школаысь пиослэн командаоссы (тренерзы Л. С. Багаутдинов) вуизы. Вераны кулэ, Выль Татышлы школа ӵошатсконэ быдэн кык командаоссэ дасям.

Азьвыл аръёсы сямен ик, командаосты Татышлы ёросысь Выль Татышлы гурт пумитаз: школалэн спортзалаз нылъёс шудӥзы, культура юртлэн спортзалаз – пиос. 2000-тӥ арысен кутскыса киысь кие выжись кубок пӧртэм ёросъёсын луиз ни. «Таяз арын кубокез кинъёс меда басьтозы? Кыӵе команда кужмогес луоз?», - тунало ӵошатсконэз адӟыны лыктэм пиналъёс.

Пиос шудон борды ӟырдыт кутскизы. Нырысетӥ пумиськонысен ик тодмо луиз: ӵошатсконэ котькуд команда зол дасяськемын. Лыдпусъёс огзы сьӧры огзы уиськыса сямен «мыно». Тани туп выж вылын ни, кожаськод, нош пиос уг сёто солы усьыны. Асьсэос пограло, шуккисько но тупез омырын возьыны тыршо. Туннэ Улысь Балтач командалы вуисьёс ӧз луэ. Кубок – соос киын! Кыкетӥ интые потӥз Выль Татышлы школалэн нырысетӥ командаез, куинетӥ – Выль Татышлы школалэн кыкетӥ командаез.

Нылъёслэн но шудонзы тунсыко азинскиз. Нырысь валаны шуг вал, кинъёс кужмогес, нош кинъёс лябгес: я одӥгез команда азьпала потэ, я мукетыз. Озьы ке но кужмоослэсь кужмо луизы бадӟым качакъёс, «Ошмес» газетлэн кубокез туэ Калтасы ёросэ «кошкиз». Кыкетӥ интылы кузё луизы выль татышлыос, куинетӥ интыын – улысь балтачъёс. Вормисьёсты дипломъёсын но медальёсын данъязы.

«Ошмес» газетлэн валтӥсь редакторез Салимьян Гарифуллин тужгес устооссэ шудӥсьёсты нимысьтыз номинациосын но кузьымъёсын пусйиз. «Лучший защитник» нимез утӥзы Улысь Балтач школаын дышетскись Лиана Шайсламова но Выль Татышлы школаын дышетскись Владимир Марданов. Бадӟым Качак школаысь Анастасия Гиндуллина но Выль Татышлыысь Рональдино Гарифуллин «Лучший нападающий» нимлы кузё луизы. «Лучший разыгрывающий» номинациен пусъемын Выль Татышлыысь Ангелина Садиева но Улысь Балтачысь Андрей Зидымаков.

Вераны кулэ, азьвыл аръёсы «Ошмес» газетлэн кузьымезлы волейболъя ӵошатсконъёсы Пермь шаерысь Куеда ёросысь удмурт школаосысь командаос но пырисько вал. Кылсярысь, 2016-тӥ но 2017-тӥ аръёсын Бадӟым Гондырысь нылъёслэн командазы кубок утӥз вал. Туэ бадӟым гондыръёс ӵошатсконэ лыктыны ӧз быгатэ, ёросазы волейболъя первенство радъяськемен. Кызьы пусйиз тренерзы И. В. Ахматуллин, волейболъя ёрос ӵошатсконысь Бадӟым Гондырысь нылъёслэн командазы нырысетӥ интыен берытскем.

Волейболъя ӵошатсконэз радъяны юрттэмзы понна, «Ошмес» газетлэн редакциез Выль Татышлыысь школалы но культура юртлы, ӵошатсконлэн валтӥсь судьяезлы Александр Сабанчинлы но командаослэн тренеръёссылы тау кылъёссэ вера.

Миляуша БУЛАТОВА.

(Тросгес туспуктэмъёс http://rbsmi.ru/oshmes/ сайтын возьматэмын).