«Тазалыклэн нуналэз»

Школаын дышетскисьёсты кышкытлыкъёслэсь утён вылысь ялӥськем месячник улсын, Янаул ёросысь Вуж Варяш школаын «Тазалыклэн нуналэз» ужрад ортчиз. Отчы быдэс школа пыриськиз. Спорт площадкаын пиналъёс азьын вераськиз гуртысь ФАП-ын ужась фельдшер К. В. Нигиева. Солэн лекциез «Таза луон - модаын» нимаськиз. Собере 5-11-тӥ классъёс пӧртэм ӵошатсконъёсын – эстафетаын, ӝуткаськонын, армрестлингын, канат кысканын - кужымзэс эскеризы. Покчи классъёс понна чылкыт омырын шудонъёс радъяськизы.