Тупаса улӥсь семья – кунмылэн данэз

Янаул ёросысь Барабановкаысь Наталья Набиуллина пичи пиезлэн семьяеныз улыса шудо луэ. Арлыдо кышномурт юртъер котырысьтызы ужъёссэс быгатэмезъя быдэсъя, нунокъёсызлэсь школаысь бертэмзэс шумпотыса вите.

- Игорь пие, Рузанна кенэ Янаулэ ветлыса ужало. Ӵукна кошко но ӝыт берто. Богдан внуке но Инна внучкае Сандугачысь школаын дышетско. Гуртысь пиналъёсты школае автобусэн нуо но ваё, - вера Наталья Гатовна.

Наталья апайлэн вань улон сюресэз та гуртэн герӟаськемын, шуыны луоз. Со Вылысь Барабановкаын вордскыса будэмын ке но, улонэзлэн тросгес люкетэз бызем гуртаз ортчемын.

- Барабановкаын 1971-тӥ арысен улӥсько, - шуэ 72 аресъем кышномурт. – Жаляса верано, кылем арын толсур толэзе кузпалы улонысь кошкиз. Таӵе ыштон ваньмы понна туж секыт, витьымтэ шорысь луиз.

Наталья апай 30 арлэсь ятыр гуртысьтызы эмъюрттэт возьматон пунктын санитарка луыса ужам. «Фельдшеръёс ӵем вошъяськизы. Котькудзылы дышоно луиз. Куддыр секыт вакытъёс но пумиськылӥзы. Озьы ке но ужме воштон сярысь ӧй малпаськы», - вера Н. Г. Набиуллина.

Рузанна но Игорь Набиуллинъёслэн семьязы 2012-тӥ арын кылдэмын.

(Быдэсак лыдӟе газетмылэн 43-тӥ номерысьтыз).