Выль юртъёс гуртъёсты шулдырто

Янаул ёросысь Сандугач гуртысь Алёна но Эллис Шариповъёс кематэк выль корка потонзылы шумпото. Выль юртсэс соос «Комплексное развитие сельских территорий» кун программая ӝуто. «Юртмы толсур толэзе дась луыны кулэ», - вера Алёна. – Эллис «Агро М» ООО-ын ужаны кутскемез бере ик та программае пыриськыны мылкыд карем. Туннэ ми шумпотӥськом, кунмы егит семьяос сярысь сюлмаське, программа кылдытэм шуыса. Бадӟым тау хозяйствомылэн, гурт поселенилэнадминистрациезлэн, ёрос администрацилэн кивалтэтэзлы».

Эллис Норканын вордськыса будэм. Али семьяеныз Сандугач гуртын улэ. Со «Агро М» ООО-ысь гаражен кивалтэ.

Кузпалъёс 2019-тӥ арысен улон сюрес кузя ӵош вамышто. Денис пизы Нефтекамскысь многопрофильной колледжын дышетске. «Юлиана сизьыметӥ классэ ветлэ. Матвей нылпи садэ мыныны дасяське», – вера А. Шарипова.

Шариповъёс туэ выль арез выль юртазы пумитанзылы оско. «Толсур толэзе коркамы выжимы ке но, со быдэсак асьмелэн луоз вить арскын гинэ. Программа озьы малпамын, али юрт ёрос администрациын лыдъяське. Вить ар ортчыса, корка дунлэсь дас процентсэ тырыса, сое собственносте выжтыны луоз», - верало кузпалъёс.

Кун программа семьяослы бадӟым юрттэт луэ. Со сяна, гуртлы, гурт хозяйствоослы азинскыны луонлык сётэ. Выль коркаос ӝутӥсько бере, гурт уз быры, со сюрессэ азьланьтоз.