«Ужаломы ӵошен, ог-огмылы юрттыса»

- Туннэ куинь пӧртэм ёросъёсы вуылӥ. Отын мон ю тысь октонэн, социальной объектъёсын тодматски, ӝутӥськон интыосы вуылӥ. Асьмелэн шуг-секытъёсмы, быдэсмымтэ малпанъёсмы вань. Озьы ке но югдур сокем секыт ӧвӧл. Туннэ Бурай ёросын социальной объектъёсын – бассейнэн, школаен, нылпи садэн, эмъюртэн - тодматски. Сюресъёс но тупатӥсько. Берлось ньыль-вить ар куспын быдэстэм ужъёс адӟиськымон, - вераз Р. З. Хамитов.

Татышлы, Балтач ёросъёсын но та ласянь югдур пӧртэм ӧвӧл. Зэм, ваньмыз умой ӧвӧл. Со сярысь нимысьтыз вераськон ӝутоно. Туннэ янгыш адямиосты ум утчалэ. Быдэстэм ужъёсмы понна гинэ шумпотомы.

Республикамылэн Тӧроез Башкортостанлы 100 ар тырмонлы 100 выль объектъёсты ӝутыны ӵектӥз: «Калыклы кулэ школаос, эмъюртъёс, газ, ву гумыос, социальной объектъёс. Выль программаез ми матысь дыре кутомы. Соин котькуд ёрос, город со пумысен туннэ ик малпаськыны кулэ ни».

Рустэм Хамитовлэн малпамезъя, та выллем ужъёсты быдэстонэ ужбергатӥсьёсты кысконо. Бюджет коньдонэн гинэ азьпала вамыштыны, пе, секыт.

Мукетыз ужпум – республикамылэн палэнысьтыз коньдон пыртон. «Асьмелэн Москваын, Санкт-Петербургын, кунгож сьӧрын тодмоосмы вань. Соос но Башкортостан Республикалэн 100 ар тырмонэзлы дасяськонэ кужымзэс мед пыртысалзы», - вера Рустэм Закиевич.

Пумиськонын Рустэм Хамитов гурт удысэн герӟаськем ужпумез но ӝутӥз. «Балтач, Бурай, Татышлы ёросъёс ог-огзылы матэ интыяськемын. Совето вакытэ Балтач ёрос 100-115 сюрс тонна ю тысь вузаз. Шорлыдын гектарысьтыз 25 центнер ю-нянь басьтӥзы. Татын одӥг гектар музъеме 50 кг удобрение пыртылӥзы. Нош табере мар? Номыр ӧвӧл ни.

Татышлы ёрос берло аръёсы йӧл дасян ласянь кужымзэ возьматӥз, - пусйиз республикамылэн тӧроез. – Татын одӥг скаллэсь шорлыдын 5,5 сюрс йӧл кыско. Азьпалан та лыдпусэз 6-7 килограммозь вуттыны тыршоно. Со понна ӟеч пудо сиён дасяно. Нош ю-нянь будэтонын та выллем бадӟым лыдпусъёс секытэн сётӥськозы – бусыоссы уродэсь».

Рустэм Хамитовез ёросъёсысь калыклэн лыдызлэн кулэсмемез но шугъяськытэ. Та куинь ёросъёсын, Тӧролэн кылъёсызъя, 20-25 ар талэсь азьвыл котькудаз 30 сюрслэсь трос адями улэм. Туннэ Балтач ёросын, кылсярысь, 19 сюрс, Татышлы ёросын – 22 сюрс, Бурай ёросын – 22-23 сюрс. Ыштонъёс бадӟымесь. Берло аръёсы вордӥськем нылпиослэн но лыдзы ӧжыт. Таӵе воштӥськонъёслэн емышсы азьпалан ассэ юн шӧдытоз на.

- Котькуд нунал асьмелы выль сюлмаськонъёс вуттэ. Соосты быдэстон понна кужымез жалятэк ужано. Адями тырше ке, емышез шӧдӥське. Соин асьмелы ужасьёсты данъян, соослы юрттон сярысь сюлмаськоно, - вера Рустэм Закиевич. - Кинлы ке но гурт удысэз ӝутон сярысь сюлмаськоно, калыклы уж интыос кылдытоно. Балтач ёросын кысконо пудоосты вордыны ферма ӝутӥзы. Кунмы соослы юрттӥз, нош фермалэсь туннэ нуналысь югдурзэ учкыны – возьыт. Кин люкетэ ужаны? Асьмеос тросгес йӧл кыскон сярысь ке малпаськомы, бадӟым но дуно ферма ӝутон пумысен вераськыны кутскиськомы. Соин туннэ выль амалъёсын ужаны дышетсконо.

Тӧролэн кылъёсызъя, гурт удысын сюлмаськытӥсь юанъёс трос. Туннэ отын калыклы уж но ӧжытгес, пе. Кылсярысь, совето вакытэ республикаямы 18 сюрс комбайн вылэм, туннэ – 3900. Озьыен, республикаямы куать поллы ӧжытгес комбайнеръёс лыдъясько. Тракторъёсъя, гурт удысын кутскись мукет техникаосъя но та выллемгес югдур. Соин туала егитъёсты механизаторлы, пе, дышетоно ӧвӧл ни, мукет удысъёсысь ӧнерчиосты дасяно.

Пумиськонэз йылпумъяса Рустэм Хамитов шуиз:

- Республикаямы 54 ёросъёс, 9 городъёс. Соос пӧлысь котькудӥз мыным дуно. Соин туннэ верасько: «Тӥляд азинсконды ёросады улӥсь калыкен герӟаськемын. Та секыт вакытэ асьмеос ужаломы ӵошен, ог-огмылы юрттыса».