Пудо вордонын кылдэм югдурез воштоно

Совещанилэн практической люкетэз «Победа» ООО-лэн Шудеке интыяськем фермаысеныз кутскиз. Хозяйстволэн кивалтӥсез вакчияк выль ужан амалъёс сярысь вераз, вуонолы азинлыко ужпумъёсынызы тодматӥз. Бӧрысь ужрадэ вуэмъёс «Янаульский элеватор» ООО-ен тодматскизы.

Совещанилэн пленарной люкетэз ёросысь культурно-досуговой центрын азинскиз. Республикаысь гурт хозяйствоя министр 2015-тӥ арлы йылпумъянъёс лэсьтыса, огъя йӧл, сӥль дасян лыдпусъёсын тодматӥз. Озьы ик ужез тодыса радъян, янгышъёсты палэнтон но выль ужан амалъёслы саклык висъян сярысь вераськиз БР-ысь гурт хозяйствоя министрлэн нырысетӥ воштӥсез Азат Зиганшин. Ӟеч выжыысь пудоосты йылэтон понна, со «Башкирское» ОАО-ен но «Башплемсервис» ГУСП-эн ужаны ӵектӥз.

Со сяна, ужрадын пудо сиёнлэн ӟечлыкез, пӧртэм висёнъёс сярысь вераськизы. Пусъемын вал: племенной ужъёслы, искусственной осемененилы, пудоосты сюдон амалъёслы тырмыт саклык уг висъяськы.

Ужрадлы йылпумъян лэсьтыса, Николай Коваленко ёрос администрациослы но хозяйствоосын кивалтӥсьёслы пудо вордонын кылдэм югдурез воштыны но та ӧрез пыр-поч эскерыны куриз, 2016-тӥ арын вуз поттонэз будэтон понна, выль ужан амалъёс утчаны ӵектӥз.

Трос верамын вал «500 ферм» целевой программа сярысь но. Со трос пудо вордон интыосты выльдыны юрттӥз ке но, огъя вераса, мар витиськомы вал – ӧз быдэстӥськы. Соин ик азьпалан та программа продукциез будэтонлы сӥземын луоз. Табере объектъёс ӝутонлы но вужъёссэ выльдонлы федерал бюджетысь коньдон висъяськоз, республика бюджетысь коньдон техника, пудо басьтонлы, искусственной осемениез азинтонлы кошкоз. Куронъёсъя, выль животноводческой комплексъёс 400-лэсь ятыр пудолы чакламын луыны кулэ, модернизация ортчытыку - 200-лэсь трос пудолы. Со дыре скалъёслэн йӧл сётонзы кык арскын 6000 килограммлы ӵошаны кулэ. Сыӵе лыдпусъёс ӧз ке луэ, огкыл воштэмын луоз.

Совещаниын шуг-секытъёсты сэрттон-пертчонлы трос дыр ке но висъяськиз, ужрад ӟеч ужасьёсты данъянэн йылпумъяськиз: Николай Коваленко РФ-ысь Гурт хозяйствоя министерстволэсь тау каронъёссэ сётӥз. Соос пӧлын «Победа» ООО-ысь скал кыскись Наталья Хаерзаманова но луиз.