Башкортостан - одӥгез кужмо регион

11-тӥ коньывуонэ Башкортостан валтӥсь праздниксэ пусъе – Республикалэсь нуналзэ. Кызь сизьым ар талэсь азьвыл, 1990-тӥ арын 11-тӥ коньывуонэ, Башкортостан Республикалэн кун суверенитетэз сярысь декларация кутэмын вал.Туэ та нуналэ пӧртэм концертъёс, валэн ворттылонъёс, ярмаркаос но мукет ужрадъёс ортчозы.

Республикалэсь нуналзэ тросэз бадӟым юбилее дасяськонын нырысетӥ вамышен лыдъяло – 2019-тӥ арын Башкортостанлэн кылдэмез дырысен 100 ар тырмонэз пусъёмы. Сыӵе указ улэ Россия Федерацилэн Президентэз В. В. Путин гожтӥськиз.

Бадӟым юбилей улсын республикаямы пӧртэм социальной объектъёс ӝутӥсько, научной но творческой конкурсъёс, акциос радъясько. Со сяна, Башкортостанын трос пӧртэм инвестиционной проектъёс быдэстӥсько. Благовар но Чишмы ёросъёсын, кылсярысь, туала куронъёслы тупась парсь вордон комплекс ӝутӥськиз. Отчы 500 адями ужаны интыяськиз. Азьланяз но республикаямы та выллем трос пӧртэм проектъёс быдэстӥськозы. Соос республикамылы экономика ласянь вылӥегес ӝутскыны, трос калыкез ужен тырмытыны юрттозы.

Ольга НИГАМАТУЛЛИНА.