-23 °С
Яркыт
Антитеррор
Вань иворъёс
Политика
1 южтолэзь 2017, 17:14

Куаразэс сётӥзы клублэсь липетсэ воштон понна

Котькуд гуртын выллем, Татышлы ёросысь Уразгильдыын но быдэстоно ужпумъёс трос. Интыысь кивалтэтлы калык пӧртэм юанъёсын вазиське. Тросэз соос тупатъяськон ужъёсын герӟаськемын. Кема ӧвӧл гуртысь клубын собрание радъяськиз, кытын тужгес «висьытӥсь» ужпумъёс сэрттэмын-пертчемын вал.

Ужрад «Программа поддержки местных инициатив» проектлы сӥземын луиз. Отчы 85 адями пыриськиз. Калыкез выль программаен пыр-поч тодматӥзы проектной консультантъёс Р. Р. Мамаев но Р. Р. Бахтиев. Выль Татышлы гурт поселенилэн администрациеныз кивалтӥсь Н. В. Рахимьянов тужгес бадӟым, асьсэлэн кужыменызы гинэ быдэстыны луонтэм ужпумъёсты нырысетӥ радэ поттыны куриз.
Арлыдо нылкышно Ираида Хасанова клублэсь липетсэ выльдон сярысь кылпум ӝутӥз.
- Клублэсь липетсэ воштоно. Тулыс лымы шунаку, сӥзьыл зоро нуналъёсы ву виямен, юртлэн борддоръёсыз пурысьтаны кутскиллям ни. Югдур умой пала ӧз воштӥськы ке, клуб пытсаськоз. Калык понна нокыӵе ужрадъёс но уз ортче ни. Егитъёсмы мар карозы? – вераз Ираида Минлисламовна.
Солэн кылъёсызлы дурбасьтыса клубен кивалтӥсь Зульфира Хатипова шуиз:
- Толалтэ клубез ворсазы ни вал, адямиослэн улонзылы кышкытлык кылдытэ шуыса. Бал-маскарадэз ульчаын ортчытӥмы. Сыӵе амалэн ужанэз туж секыт. Калыклэн азьло сямен шуныт, югыт клубын шулдыръяськемез потэ.
Нош Валя Бадрисламова «Центральная» но «Нагорная» урамъёсты тупатон сярысь малпанзэ вераз. Алина Сиразетдинова вузкарон киоск вӧзысь гудӟемез тупатоно шуыса вазиськиз. Котькуд ужпум понна люкаськем калык куаразэ сётӥз. Тросэз лэчыт ужпумен лыдъязы клублэсь липетсэ воштонэз. Коньдонэн юрттыны мылкыдзэс но веразы. Собраниын огкылэ вуизы: проектын вормисе потӥзы ке, котькуд юртысь 1000 манетэн коньдон люкалозы. Малпам ужлэсь быдэстӥськемзэ эскероз инициативной группа, кудӥз собраниын куара сётон амалэн ик быръемын вал. Отчы пыртэмын Уразгильдыын улӥсьёс Снежана Бадртдинова, Алексей Гафиуллин, Альфид Зайноков, Александр Нуриахметов, Виталина Фазлтдинова, Анюта Хатипова но Зульфира Хатипова. Соос, проектэз улонэ пыӵатон вылысь, гурт поселенилэн администрациеныз ӵош спонсоръёсты шедьтон, ужез пыр-поч радъян бордын тыршозы.
Читайте нас в