Татышлы ёросын Вормон Нуналэз пусйизы

Сое митинген усьтӥзы. Люкаськем калыкез дано нуналэн Татышлы ёрос администрациен кивалтӥсь Ф. Р. Шайхисламов, Балтач но Татышлы ёросъёсысь военной комиссар А. Ф. Арсланов ӟечкылазы. Митинге пыриськисьёс ож бусыын бырем ожгарчиосты буре вайыса одӥг минут ӵоже чус улӥзы. Нош собере парад кутскиз. Отчы дышетскисьёс, студентъёс, нылпи садэ ветлӥсьёс, эмчиос, пограничникъёс, барабанэн шудӥсь нылъёс, крезьгуро инструментъёсын шудӥсьёс пыриськизы. Парадлы аспӧртэм шӧм пыӵатӥз Быдӟым Атыкай ож вакытэ но со бере аръёсы калыклы юрттэт возьматэм техника. Соосыз нимысьтыз военной операцие но мукет ожъёсы пыриськем пиос возьматӥзы.

Парад бере котыре  «День Победы» кырӟан чузъяськиз. Ужрадэ люкаськем калык сое ӵошен быдэстӥз. Шумпотоно, туэ «Бессмертный полк» акцие пыриськисьёс но трос луизы шуыса. Адямиос, песяй-песятайёссылы шудо улонмы понна тау карыса, ульчаостӥ соослэн туспуктэмъёсынызы ортчизы. Быдӟым Вормонлы сӥзем ужрад концертэн йылпумъяськиз.