Гуртъёсы улмопу сад мерттӥзы

Калмиярын улӥсьёс груша но улмопу мерттӥзы. Субботнике соос быдэс гуртэн люкаськизы. Тыршемзылэн емышез синмаськымон пӧрмиз: садэ радэн-радэн 60-лэсь трос писпу мерттӥзы.

Петропавловкан улӥсьёс но та нуналэ вазь ӵукна ик люкаськизы. Пиосмуртъёс писпу мерттыны кутскемлэсь азьвыл тазатӥськыны но вутскизы, ульчаысь куасьмем писпуосты вандӥзы. Нош собере ваньзы ӵошен писпу мерттон борды басьтӥськизы. Шумпотоно, та нуналэ субботнике песяйёсынызы ӵош пиналъёс но вуизы. Озьыен, соос тодозы-валалозы, писпуосты утёно шуыса. Азьланяз арлы быдэ Петропавловкаысь 50-лы матэ улмопу тулыс куазен чебер сяськаеныз шумпоттоз, нош сӥзьыл – ческыт емышенызы. Петропавловкаос садзэс кенерен котыртӥзы.

Калмиярын но Петропавловкаын улӥсьёс арлы быдэ тулыс куазен субботникъёсы пырисько. Соос нырысь шайвылэз тазато, собере сюрес дурысь жуг-жагез окто. Зэм, отчы пыриськисьёслэн лыдзы сокем трос ӧвӧл. Нош писпу мерттон гуртъёсысь вань калыкез огинэ люканы быгатӥз. Соин та нуналэ тросэз азьвыл аръёсы вемеен ужамзэс тодазы ваизы, луоз. Калмияръёс но петропавловкаос нимаз ке но тыршизы, ужзы капчи мынӥз. Мерттэм писпуоссы гинэ мед улӟозы.