Гуртысь тужгес арлыдоезлы улӥсьлы – медаль

Ефросинья Николаевналы 95 арес. Арлыдыз шоры учкытэк, со номырлы уг ӝожтӥськы, лыктӥсь-пырисьёсты капчи мылкыдын пумита. Ож аръёсы но со бере адӟем секытлыкъёсыз сярысь кема мадьыны быгатэ.

Быдӟым Атыкай ож кутскыку, Е. Н. Макаровалы 12 арес вылэм. Эшъёсынызы шудон интые, со дырысь пичиос ужаны потӥллям. Е. Макарова нырысь колхозын ужам, собере нылкышноосын, арлыдо песятайёсын ӵош Туймазы ёросысь Нижнетроицкое вӧзысь нюлэскын кор корам. Сеяльщица луыса но со тыршем. Огкылын вераса, Ефросинья Николаевналэн ужтэк пукем дырыз но луымтэ, аръёссэ со вордскем шаерез понна ӟеч ужъёс лэсьтонлы сӥзем. Секыт минутъёсаз солы кырӟан, крезьгур юрттэм. Кема аръёс ӵоже Ефросинья Николаевна гуртысьтызы «Тодэ ваён» удмурт фольклор ансамбле пыриськем - кырӟам, балалайкаен шудэм. «Туж секыт вакытын улӥм. Сиён, дӥськут ӧй вал, секыт ужез ужаны кужым кулэ. Нош ӝыт милемлы война сярысь вунэтыны юртто вал кырӟанъёсмы», - вера Е. Макарова.

Медаль сётыса, Олег Михайлович Ефросинья Николаевналы тау кариз. «Гажано Ефросинья Николаевна, тӥ трос кужымдэс понӥды ёросмы ӟеч мед азинскоз шуыса. Тӥляд тыршемдылы мертэт ӧвӧл – кужымдэс жалятэк ож мышкын тыршиды. Ми тӥледлы йыбырттӥськом, котьку тӥлесьтыд адӟем кариськом. Гуртоослэн но аслам нимыным тӥледлы тазалык, ваньзэ ӟечсэ сӥзисько», - вераз О. М. Никитин.

Фото: Ермекеевский район Республики Башкортостан