Кык шуръёс

Кемалась-кемалась, соку Музъем вылын адямиос но ӧй вал на, вордӥськизы кык шуръёс: Уфимка но Юрюзань. Башкир сямен Уфимкаез Караидель нимало на, со «сьӧд шур» шуэмез валэктэ, нош Юрюзань – «бадӟым шур».

Нырысь та шуръёс ог-огзэс чик ӧз тодэ. Ӧръяськыса-ӧръяськыса виязы соос. Асьсэлы сюреслы тужгес шулдыресь интыосты бырйыны тыршизы. Сюресъёссы кузямъя, шуръёс паськытазы, мургес но мургес луизы. Соослы «будыны» юрттӥзы ошмесъёс, пичиесь шуръёс.

- Мыным туж мӧзмыт, нюлэсъёсын, гурезьёсын вераськисько ке но, соос монэ трос дыръя уг валало. Луысал ке матысь эше, улонэ шулдыргес луысал, - ӵем малпаськылӥз Юрюзань. Одӥг нуналэ со жильыртэм куараез кылӥз. Со валаз, кытын ке, кыдёкын ик ӧвӧл, шур бызе шуыса. «Шокамезъя тодмо, со – пичи шур ӧвӧл. Мыным соин одно ик эшъяськоно», - куараен верамзэ шӧдытэк но кылиз Юрюзань.

- Эшъяськом, - шуккиськиз котыре. – Ӵошен азьланьтом сюресмес.

Юрюзань шумпотӥз. Со ӝоггес но ӝоггес бызьыны кутскиз. Озьы со тодматскиз Уфимкаен. Бадӟым «сьӧд шур» сое бордаз басьтӥз. Со дырысен кык шуръёслы мӧзмыт ӧз луы ни: дауръёс ӵоже, уен-нуналэн соос ӵош вияло. Номырлэсь уг кышкало: ӝужытэсь гурезьёслэсь но, пеймыт нюлэсъёслэсь но,  тудвуослэсь но, кужмо зоръёслэсь но...

Дунне вылэ адямиос кылдӥзы. Нырысь Юрюзанен Уфимка шумпотӥзы, соос доры ветлӥсьёс вань шуыса. Аръёс ортчыса, шумпотонзы куректонлы пӧрмиз.

- Акыльтӥзы ни та адямиос, - вера Уфимка.

- Азьло асьмелы номыр кышкыт уг поты вал. Нош али? Адямиос быдтозы ук асьмемыз, жуг-жаг пӧлы кельтозы, - дырекъясь куараен вера Юрюзань. - Вамышлы быдэ сямен жаг люкъёс кылдэмын ни. Супермаркетлэн ӝажыосаз выллем, мар гинэ вӧзамы ӧвӧл – полиэтилен пакетъёс, коробкаос, консерва банкаос, ӟенеликъёс, пластик посуда, пияла пырыос…

- Мед шутэтскозы, вуын мед пыласькозы. Медаз ултӥялэ вал соос инкуазез, котырысьтызы чеберлыкез, - бӧрдыса сямен шуэ Уфимка. – Ми адямиостэк но улӥм, азьпалан но улыны быгатомы. Нош митэк, ву ке ӧз луы ни, адямиос кӧня ке час куспын шокамысь дугдозы. Но ӟечезлы осконме уг  ыштӥськ ай, соос валалозы янгышсэс – Инкуазез-анаймес утялтыны кутскозы.