Сюресмы "Янган-Тау" геопарке вуттӥз

-Туэ кытчы мыноно, - йырам малпан берга. – Салават ёросэ, оло?

- Иське, Салават Юлаевлэн пытьыостӥз ортчом, - шуэ пие.

Картаез пыр-поч эскерим, интернетын «бугыръяським», Салават ёросын кыӵе интыосты учкыны луэ шуыса. Нош шутэтскон нуналъёсы ини сюрес вылэ потӥм. Ньыль часлы матэ кыстӥськись сюресмы милемыз «Янган-тау» геопарке вуттӥз.

Нырысь «Кургазак» источнике дугдӥм. Татысь визит-центрын маршрутэн тунсыкъяським. 

Милемлы ӵектӥзы Идрисовская пещерае вуылыны. 45 метр ӝуждалае тубем бере, сокем чебер суред усьтӥське. Вуоссэ кыдёке-кыдёке нуись Юрюзань кырым пыдэсын выллем адске. Со котыръяськыса вия. Гурезьын шоканы капчи, пещера выль кужым сётэ кадь. Астэ инмын лобась ӧрӟи выллем кожаськод. Син сузёнтэм нюлэсъёс, вераса быдтонтэм чебер инкуазь суредъёс – соос пыраклы тодэ кылё.

Вераны кулэ, пещерае тубыса васьконэз секыт ӧвӧл. Гурезьысь изъёс тубат выллемесь. 

Яхинской водопадэ но вуылӥм. 

Текеевое нуись сюресэз ширтыса гинэ ортчыны ӧз пӧрмы

«300 иськемлэсь ятыр сюресэз ортчыса, Салават Юлаевлэн музеяз кожылоно», - малпамы ми. Малоязысь шаертодонъя музейын ужась калык герой сярысь трос тунсыкозэ мадиз, солэн вордскем интыез сярысь но вераз, отчы мыныны ӵектӥз.

- Толон Салават Юлаевлэн вордскем музъемаз Башкортостанлэн тӧроез Радий Хабиров вуылӥз, - вера кузпалы. – Батырлэн 290 ар тырмонэзлы сӥзьыса, отын туристической маршрут ӝутозы, визит-центрез но луоз.

Азьпалтыса верало, Текеевое нуись сюресэз ширтыса гинэ ортчыны ӧз пӧрмы. Йыромыса но ветлӥм: навигатор мукет сюресэ но лэзьылӥз, куд-ог дыръя ньыльнамылэн навигатормы ньыль пала возьматъяз. Связь, интернет сярысь веранэз ик ӧвӧл.

Тани Алькино гуртэз ортчыса, бусы сюресэ кожим. Пумитамы пиосмурт вамышъя. Сюресэз юано кариським. Шонер, пе, мсынӥськоды. Но пичи шур дуре вуыса, сюрес быриз. Берытским. Гуртэ вуыса, адямиослэсь юалом ни шуиськом. Но ульчаын нокин уг адскы. Гурт пуме потыса вуиськом вал ини, капка азяз пукись песятаез адӟим. Со милемлы сюресэз пыр-поч валэктӥз.

Нош ик нюлэс, нош ик изо сюрес. Кема-а, ӧжыт-а мынӥм – ура! Излэсь юрта адскиз. Со вӧзын – кык мемориалъёс. Текеево гурт али картаын ӧвӧл ни. Кызьы вераз музейын ужась, сое Пугачёв бунт дыръя ӝуатӥллям. Юрта вӧзысь одӥгез мемориал Салават Юлаевлы сӥземын, кыкетӥез - ӝуам гуртъёслы. Вераны кулэ, Салават ёросын, Текеево сяна, сизьым гуртъёсты ӝуатыса быдтӥллям на. Дас тямысэтӥ даурысен картаысь ышиллям Исмаил, Юлай, Якуп, Азналино, Бикбулат, Касай но Мрат гуртъёс. 

Текеево туж шулдыр интые – кык шуръёслэн огазеяськон вадьсазы - пуксемын вылэм. Котырак – нюлэс. Татын аспӧртэм шыпыт. Кожалод, одӥгез бадӟым пужым сьӧрысен Салават Юлаев милемыз эскерыса улэ…

Салаватлэн гурезез

Музее пыракумы, Салаватлэн гурезез сярысь но веразы. Вань сыӵе веран, герой отысен, сьӧраз уйиськись тушмонъёсызлэсь пегӟыса,  валэныз Юрюзань шуре, пе, тэтчем. Со гурезез но шедьтӥм. Геологъёс сое Наси геологической разрез шуыса нимало. 

Татын Юрюзаньлэн вуэз ошмес ву кадь чылкыт. Шурлэн бурпал ярдураз интыяськем гурезь вуын синучконын выллем адске. туж шулдыр. Татысь кошкем ик уг поты. Шутэтскыса, ӝытсэ татын сиськыса, кӧлыны «Кургазак» гостинично-сервисной комплексэ мынӥм.

Кытын уськытэын «Вечный зов» кино?

Ӵуказе кыӵе интыосы вуылон пумысен вераськыкумы, кузпалы шуэ, «Вечный зов» кинолэн люкетэз Салават ёросысь Сабакай гурезьын уськытэмын, лэся, шуыса. Нош Альфия эшелэн малпамезъя, кино Белорецк ёросын уськытэмын. Котькудзылэн ӝоггес тодэмзы потэ ни, кин шонер малпа меда? Юа вылэм гугллэсь, интернет ӧвӧл. Кузпалы кема аръёс ӵоже будэм пужыме тубыса, интернетэз «кутыны» малпаз. Пӧламы ӝужыт мугоро Алмаз луэмен, со малпамзэ лэсьтӥз.

- Интернет вань, - вазе со писпу вай йылысен. – «Вечный зов» уськытэмын… (Альфиялэн сюлмыз потыны турттыса йыгаське, лэся – авт.) Дуван ёросын Сабакай гурезьын.

Кино пумысен соос кыксы ик янгышазы ке но, со интые мыныны кенешим. Сабакайен, отысь пещераен гераськемын «Вечный зовысь» Савельев агай-вынъёслэн улонзы. Антон Савельев каторгаысь пегӟыса, пещераын ватскыса улэ. Фёдор выныз солы сиён нуэ. Соку, сое эскерыса, сьӧраз мыно Демьян но жандарм Косоротов.

Сабакай

Путешествимылэн кыкетӥ нуналэз Мечетлино разрезэс учкон бордысен кутскиз. Сабакай гурезе нуись сюресмы нош ик капчиен ӧз сётскы, гопо-гурезё интыосты трос ортчылӥм. Ташаулово гурт вӧзын Юрюзаньлэн ярдураз куать метръем адямилэсь шайгузэ но адӟим. Гуртын улӥсьёс верало: «Со огназ улэм, туж ӟеч адями вылэм. Солэн шайгуэз гуртмес тулыс кышкыт тудвулэсь уте».

Сабакай – паймымон гурезь. Со син сузёнтэм ӝужыт, йылаз пилемъёс шутэтскыны пуксьыло, кожалод. Пещера но татын одӥг гинэ вылымтэ.  

Бертон сюрес вакчи потэ

Бертон сюрес сярысь чорыгасьёслэсь юалляським. Возьматэм сюрессы внедорожникъёслы чакламын ке но вылэм, кык пичи шуръёсты капчиен выжим. Нюлэс пыр но потӥм. Косуляез но пумитамы, тэтчаса шудӥсь кык бурундукъёсты но учкыса сылӥм. Тэль пыр потыку куазь кисьтыса зорыны кутскиз. Соку Татышлы ёросысь нюлэс сюресъёсты син азе пуктӥ: зорыку милям нюлэсъёстӥ Ниваен мырдэм ортчод.

Кык нуналъем эскурсимы Башкортостанлэсь трос интыоссэ «усьтӥз». Вуоно гужем нош ик республикамылэн шулдыр интыосаз вуыломы.