Гудыръяса зорыку кызьы астэ утёно?

12-тӥ пӧсьтолэзе Уфа шур дурын кышкыт учыр луиз. Гудыръяса зорыку кышномуртэ ӵашйиз. Жаляса верано, гужем вакытэ таӵе учыръёс ӧжыт уг пумисько. Гудыръяса но ӵашйыса зорыку астэ кызьы утёно?

Гудыръяку нюлэскын

луиды ке

Гудыръяса зорыку нюлэскын ке луиды, оген будӥсь писпу улэ пырыны эн дыртэ. Писпуэз ӵашйиз ке, со вӧзысь адями но сӧсырмыны быгатэ. Ӝуась тыл вӧзы но кариськыны уг яра. Пӧсь омыр электричествоез капчиен пыр поттэ. Со сяна, ӝужыт писпуосы эн тубе.

Гудыръяку бусы шорын

 луиды ке

Котырак учке, ӝужыт интыын уд сылӥське-а шуыса. Трос дыръя сыӵе интыосы ӵашъе угось. Корт заборъёс, электроюбоос, проводъёс вӧзын сылоно ӧвӧл. Гудыръяса, чилекъяса зорыку гольык пыд эн ветлэ. Чумолёос, оген сылӥсь сарайёс кышкытлыклэсь уз уте. Со сяна, пельпумады токез пыр поттӥсь ужан тӥрлыкъёс, кылсярысь, саник,  кусо медаз луэ.

Гудыръяку тӥ машинаын ке

Машинаез кысоно но зорлэсь ортчемзэ машина пушкын возьмано. Гудыръяку машинаез заправлять карыны, машина улэ ватскыны, киын корт арбериос возьыны уг яра.

Гудыръяку тӥ ву дурын ке

Гудыръяса зорыку вуэ эн пыре, шур дуре эн интыяське, пыжен эн уялэ, эн чорыгалэ.

Гудыръяку тӥ коркады ке

Укноосты, ӧсъёсты ворсано. Электроприборъёсты кысоно, телефонэз зарядкаысь басьтоно но соин вераськоно ӧвӧл. Укно, ӧс вӧзын сылыны уг яра.

Туспуктэмез Валерий Шаховлэн.