Чагыр синмо, чагыр сяськабурдо

Тодам лыкто покчи классъёсын дышетскем кырӟан чуръёс:

Ӟег пӧлын - зангари,

Зангари, зангари.

Небытэсь киосын

Кин бича соосыз?

Тунсыко, малы та чагыр синмо, чагыр бурдо сяськаос ӟег пӧлын яке азьвыл ӟег будэм бусыын гинэ пумисько меда?

Вашкала дырысен возиськем легендая, огпол Ю бусылы Ин вазиськем:

- Ваньзы, мар гинэ музъем вылын будэ, кин гинэ отын улэ, мыным тау каро. Бурдоос шулдыресь гуръёссэс кузьмало, сяськаос ческыт зынзэс жалятэк пазяло, нюлэсъёс но лумбыт-уйбыт монэн сӥпырто. Нош тынад мыным ноку тау каремед ӧвӧл. Тынэсьтыд юостэ мон зорен шумпоттӥсько угось. Соин ик соос тыро шепъёс сёто.

- Тау каремме возьматыса, мон сьӧд музъемез вож шобретэн шобыртӥсько, нош сӥзьыл – зарни шепъёсын. Мукет сямен мон тау каремме возьматыны уг быгатӥськы, - вазем Ю бусы. – Юртты мыным, соку мон яратыса ненег кылъёсме верало.

Ин соглаш луэм.

- Тон уд быгатӥськы бере мон доры тубыны, ачим тон вӧзы васько, - шуэм Ин. Витьымтэ шорысь ӟег пӧлы чагыр ин тусъем сяськаос ӝужаллям. Со дырысен бусыысь шепъёс, тӧл пельтэмлы быдэ, Инлэн кузьымезлы йыбыртто. Соослы ненег кылъёссэс сӥпырто, синмаськемзы, яратонзы сярысь верало.

Зангариослэн кылдэмзы сярысь украинской выжыкыл но вань.

Кемалась-кемалась одӥг гуртын куанер нылкышно улэм. Кузпалыз солэн кулэм. Вань вылэм кышномуртлэн Василь нимо пиез. Ужась, чебер пияш шоры трос нылъёс синмаськыса учкиллям. Но Василь огзэс но бырйымтэ. Ӵукнаысен ӝытозь со ю бусыын тыршем. Нош ӝыт шур дуре пыласькыны, шутэтскыны ваське вылэм. Пуксись шунды шоры учкыса кема пукылэм со яр дурын. Пияш тодымтэ та шурын русалкалэсь улэмзэ. Вуын будӥсь турынъёс пӧлтӥ пияш шоры синмаськыса учкемзэ. Огӝытэ русалка Васильлы вазиськем: «Тон монэ яратысалэд ке, асьмеос ву пыдсын улысалмы. Татын котьку салкым, каньыл. Учкы, кыӵе мон тусбуйлы чебер». Но Васильлы русалкалэн чеберлыкез кулэ луымтэ, со вордскем музъемзэ, бусызэ быръем. Русалкалэн вожез потэм. «Иське, тонэ нокин но яратыны медаз быгаты. Мед пӧрмод тон аслад ӟег бусыяд будӥсь сяськалы!», - шуэм русалка.

Ӟег пӧлы сяська ӝужам. Чагыр-чагыр со: Васильлэн синъёсыз тусъем, шурысь ву выллем! Со сяськаез калык василёк нимам, ышем пияшлэн нимыныз герӟаса.

Тодосчиослэн эскеронъёссылы осконо ке, дунне вылын зангарилэн видъёсыз 550-лэсь ятыр лыдъясько. Асьме доры со вашкала даурысь вуэмын. Тутанхамонлэсь гробницазэ эскерыкузы, трос зарни арбериос, дуно украшениос шедьтэмын. Но археологъёсты паймытэм мукетыз – саркофагын зангариослэсь керттэм тугоко возиськемын. Сяськаос куасьмемын ке но, соослэн туссы бездымтэ, формазы но возиськем.

Фото: https://vk.com/id22919365?z=photo22919365_457249715%2Fphotos22919365