Улонын пӧртэм дыръёс луо

Со мадиз: «Оген кылёнлэсь но кышкытгес ма меда вань дунне вылын? Огнад ӧвӧл шуыса тодон – тросэз понна бадӟым шумпотон но шуд.

Тон тыршись, азинлыко адями, котькуд ужед кияд пӧзе, уж тубат кузя вылӥе капчиен тубиськод, котырад азинлыко адямиос, уно эшъёсыд трос. Ваньзы тонэ ушъяло, котьку юрттыны дась луэмзэс верало. Но улонад секытлыкъёс пумиськыса, ваньмыз куажганы кутске ке, тон сярысь ваньзы вунэто. Секыт югдурын тон огнад кылид шуыса малпась но ӧвӧл ни. Озьыен, шуг-секытъёсын тон ачид гинэ нюръяськоно луиськод.

Тодӥсько, улоназ котькуд адямилэн сыӵе историез вань, куке со секытлыкъёс пӧлы йыромылӥз но отысь потыны сюрес огназ утчаз. Адями ог-огезлы шудо дыръя гинэ кулэ шат? Эш, эшлыко кусыпъёс сярысь кӧня вераськимы ке но, улон мукетсэ возьматэ: огшоры гинэ верам кылъёс со.

Ваньмыз валантэм. Сюлэм куректэ, лулы бӧрдэ кадь. Малпанъёс котырто, зӥбо. Озьы, адямиос, улон шоры но мукет синмын учкыны кутскиськод. Соос азьло кадь мусо, лякыт, матысь уг адско ни, тодмотэм адямиослы пӧрмемын. Нош малы? Ачид янгыш шат сыӵе эшъёс быръемысь?

Мынам улонам но секыт вакыт луиз. Огдыре мон чылкак огнам вал. Шуг-секытъёс но…мон. Чигисько кожай вал. Но чидай. Уно синвуос ке но кисьтӥ, со вакытысен мон синмо луи, шуыны луоз. Сыӵе дырез ортчыса, мыным улыны капчигес луиз. Улон шоры но, адямиос шоры но чылкак мукет синмын учкыны кутски. Паймисько, кызьы мон азьло со «матысь» адямиослэн кылъёссылы оскиськем меда? Кызьы соос бордысь шунытлык утчаськем? Юрттэт витиськем? Малы мынам ӟеч сямо луэменым соос пайдаясько гинэ шуыса валаськымтэ?

Тодӥсько, та юанъёсты мон гинэ ӧвӧл, трос адямиос асьсэлы асьсэос сётъяло. Секыт оскыны огезлы: котырад одӥг но оскымон эшед ӧвӧл. Котькинлэн аслаз сюлмаськонъёсыз, но со сюлмаськонъёс пӧртэм степенё луо, шуыны луоз. Тужгес секыт луэ, куке тынад семьяед шуге-леке шеде, нылпиосыд, яке кузпалыд, яке анаед, яке атаед висьыны усё.

Азьло адямиос ог-огзылы котьку юрттыны дась вал. Али соосын мар луиз? Вералэ ай, дунне воштӥськиз-а? Зэм, воштӥськиз. Нош сюлэм, лул? Соос малы-о воштӥсько? Малы асьмеос трос дыръя асьмелэсь шуг-секытъёсмес гинэ вылӥе пуктӥськом? Малы матысьёсмылэсь куректонъёссэс дыр ортчыса гинэ валаськом, чик ум тунсыкъяськиське соослэн улон-вылонэнызы? Асьмелы мар ке луоз шат дас минут дырмес соослы висъямы ке, шуныт пальпотонмес кузьмамы ке? Соослэн ӟечезлы осконзы кылдоз. Валалозы: шуг-секытъёссэс люкыны соослэн матысь адямизы вань шуыса. Ӵошен котьмае вормыны луоно.

Пиедлы школае мыныны пыд кутчан басьтыны коньдонэд ӧвӧл. Тон понна со – проблема. Нош коллегаедлэн анаез висьыны ке усем? Со сярысь тон малы йырдэ висьытод, со тынад анаед ӧвӧл ук, ачиз кызьы ке но «веськатоз», шуг-секытъёсыз пыр потоз. Озьы-а? Улонын сыӵе адямиос но пумисько, кудъёсыз тынад сюлмаськонъёсыныд тунсыкъясько, жалямъясько но, тон юанзылы вераны но уд вуы, тонэ асьсэлэн сюлмаськонъёсынызы пылато.

Зэмзэ ке верано, адями оген но шуг-секытъёсты вормыны быгатэ. Но оскымон адямиос луыку, трослы капчигес. Озьы но луэ улонын: тыныд юрттэт кизэ мыче сыӵе адями, кудӥзлэсь тон юрттэт уд возьмаськы вал, яке со, кинлы тон азьло ӧд юртты вал. Сыӵе дыръя кепырес луэ. Нош ик адямиос шоры мукет сямен учконо».