Эмъюм пӧрмиз кампетлы

Куке но кампет ческыт сиёнэн ӧз лыдъяськы. Сое эмъюм интые гинэ кутылӥзы. Со латин кылысь но «дасям эмъюм» шуыса берыктӥське угось. Берло кампетъёс ап­текаосысь вуз карон юр­тъёсы выжизы. Табере че­скытэз яратӥсьёс котькуд сӥзьыллэн одӥгаз нуналаз – 18-тӥ коньывуонэ - сакыро сиёнъёсты веръяло. Европа­ын таӵе ӟеч сям возиське. Та нуналэ аслад киосыныд кампет дасяськод но маты­сьёстэ чай юыны вазиськод яке ачид соослэсь чечымзэс веръяны мынӥськод. Нош Россиысь тросаз городъё­сын та нуналэ калыкез кам­пет поттӥсь фабрикаослэн дасям ческыт сиёнэнызы урамын ик кунояло. Таӵе «че­скыт» акциос пичиослы но, бадӟымъёслы но туж кельшо. Вуз карон юртъёсы та нуналэ тросгес пӧртэм кампетъёс потто. Нош ресторанъёсын но кафеосын кампетэз дасянъя мастер-классъёс радъясько. Калыккуспо праздникез ди­етаын пукисьёс но пусйытэк уг чидало. Араз огпол, пе, сое тӥяны но луэ. 

Нырысетӥ кампетъёс Египетын кылдӥзы. Та ва­кытэ сакырез тодымтэен, со интые финикиез но чечыез ужазы кутӥзы. Шундыӝужан шаеръёсын кампетъёс мин­дальлэсь но фигилэсь да­сяллязы ке, Вашкала Римын мульыез но мак тысез чечыен пӧзьтыса кун­жутэн пызьналлязы. Асьме дорын, Вашка­ла Русьын, сое бадяр сиропен, патокаен но чечыен лэсьтылӥзы.

Тужгес шонертэм но янгыше уськытэм кампет - шоколад. Ев­ропаын, 16-тӥдаурын, шоколадэз эмъюмо но адскисьтэм ку­жым сётӥсь сиёнэн лыдъяллязы. Н о ш куке солэсь пайдазэ ӧз шӧдэ ни, шокола­дэз урод сиён пӧлы пыртӥзы. Одӥг кыш­номурт эшезлы гожтэ: «Шоколад сиыны тыныд уг ӵектӥськы ни. Мынам тодмое нуны вайыны дасяськыкуз сое сиылэм. Соин солэн ну­ныез сьӧд вордӥськем».

Тужгес тодмо луись  кампетъёс – пралине. Соос 1633-тӥ арын поттэмын. Пӧзьтӥськись сое Герма­ниысь француз посоллы ни­мысьтыз дасям. Соин прали­не кампет туннэ нуналэ но Германиын но Швейцариын трос вузаське.

Тужгес бадӟым кампет – Хаги-Бой нимо гондыр пи. Со­лэн ӝуждалаез 1,68 метр, нош секталаез 633 килограмм. Сое дасян понна нимысьтыз 4 тонна форма кулэ луэм. Емышъёслэсь дасям кампет кык арня пала куасьмем.

Чупа-Чупс космической кампетэн лыдъяське. 1995- тӥарын Россиысь космо­навтъёс Музъемысь кампет лэзьыны куриллям. ЦУП-ын (Центр управления полёта­ми) соослы Чупа-Чупс-эз ке­ляны малпаллям. Озьы таӵе кампет космосэ но вуылэм.

Дунне вылысь тужгес аспӧртэмлыко кампет - финн кампет. Финнъёс сое чырс, кузьыт но мувӧй шӧмо лэсь­то.

Советской кампет – Пти­чье молоко. Сое лэсьтон понна агар-агарез куто, кудзэ зарезь будосъёслэсь потто.