Сюсьтыллы укшась сяськаос

Тани кин ке но сяськаос пӧлын туспуктэм лэсьтыны малпам, мукетыз сяська керттэт бичам, куинетӥез ненег сяськаос шоры учкыса уг тыры. Выжыкыл дунне!

Та сяськалэн нимыз «lupus» латин кылысь пӧрмемын:«кион» кылэз возьматэ. Одӥгез легендая, вашкала дыръя люпинлэсь сурет дасяло вылэм. Сое юыса, адями кионлы пӧрмылэм. Мукетыз легенда люпинлэсь котькыӵе интыын будыны быгатэмзэ, кион кадь чидась луэмзэ возьматэ. Куазь зоро ке но луиз, нуналлы быдэ пӧсь шунды ке но ӵушказ, люпин арлы быдэ сяськаяське. Нокыӵе куазь солы кышкыт ӧвӧл, со аслыз ачиз улыны луонлыкъёс «кылдытэ», уго люпин будосъёс-сидератъёс пӧлы пыре. Солэн выжыосыз пӧлын азот кылдэ. Со сяна, сидератъёс музъемез небытато, сюйлэсь кислотностьсэ кулэсмыто.

Люпинэн адями вашкала дырысен пайдаяськем. Тӧдьы люпинлэн кидысъёсыз Египетысь фараонъёслэн гробницаосысьтызы но шедьтэмын (асьме даурозь 2000 ар азьвыл). Та сяська Америкаысь Техас штатлэн тодметэз луэ. Люпин сяськаяськон вакытэ туристъёс соос пӧлын чебересь туспуктэмъёс лэсьто.

Люпин араз кык пол сяськаяське: ивожое-пӧсьтолэзе но куарусёнэ. Сӥзьыл солэн сяськаосыз гужем выллем трос уг луо. Та сяськаос тросэзлэсь бакчаоссэс но шулдырто. Кыӵеосыз гинэ ӧвӧл: чагыр, фиолетовой, тӧдь, лызалэс-чагыр, льӧль, ӵуж, горд, гордо-тӧдьыё но мукет. Люпин трос утялтэмез кулэ уг кары ке но, мерттэм бере 5-6 куать арскын пӧртэм тусо сяськаос чагыр туслы пӧрмыны быгато. Маин со герӟаськемын? Кидысэз кисьтӥськыса потэм будослэн доминантной чагыр тусыз, шуом, кужмо луэ. Бакчаяды будӥсь люпинъёсты нырысь мерттыкуды выллем пӧртэм тусъёсынызы мед шумпоттозы шуиды ке, соосты сяськаяськемысь дугдэм беразы выжыоссэс люкылыса мерттэ.

Фото: https://vk.com/id488082318?z=photo488082318_457241478%2Fphotos488082318