Кыӵе палатка быръёно?

- Котькыты мыныны мед яралоз, шуом «на все случаи жизни», - дӥсьтытэкгес верасько. Аслам йырам малпан кылдӥз: макем та пияш ас ужзэ ӟеч тодэ.

- Вань, конешно, универсальной палаткаос. Но нимысьтыз палаткаосты бырйыса умойгес луоз. Кылсярысь, мынам вить палаткаосы, котькудӥзлэн - аслаз нюансъёсыз, - валэктэ вузкарись.

Ӝыны час куспын Андрей палаткаос сярысь туж трос мадиз. Солэн кенешъёсыныз лыдӟисьёсын люкиськыны кариськи. Гужем тросэз шутэтскыны потало угось.

Зэм, палаткаос пӧртэмесь луо: вылтуссыя но, быдӟалазыя но, туссыя но, пушкысь «планировкаоссыя» но, каркассыя но, материалзыя но… Палатка бырйыку лыдэ басьтоно: кытчы тӥ ӵемгес шутэтскыны потаськоды? Табере ваньмыз сярысь вакчияк.

Тент.

Тӧл но ву пыртӥсьтэм мед луоз. Сыӵеен лыдъясько силиконэн пыӵатэм тэнтэн палаткаос. Тэнт юн луыны кулэ, пичи вай бӧрды йӧтыса медаз кеськы. Консультант Андрейлэн кылъёсызъя, армированной материаллэсь палатка кемалы тырмоз, секталаезъя но дунызъя со ӧжыт висъяськоз.

- Одӥг посэс (однослойной) палаткаосты басьтыны уг ӵектӥськы, - вера Андрей. – Малы ке шуоно соос борды конденсат люкаське. Пусъёно, туала палаткаос тросэз кык полэс лэсьтэмын луо: вылӥ тент зорлэсь, лысвулэсь уте. Кык полэс басма вискысь пространство конденсатэз палэнтэ.

Тент нейлоннлэсь но полиэстэрлэсь луэ: быръёно кыкетӥзэ. Нейлон котмыса кыстӥське, соин ик палаткадэс олокӧня пол тупатоно луоды. Но дунызъя нейлонлэсь палатка, полиэстернен ӵошатыку, дунтэмгес луэ.

Палаткалэн пыдэсыз.

Палаткалэн пыдэсэзлы тужгес бадӟым саклык висъяно: вуэз медаз пыӵаты. Андрейлэн ӵектэмезъя, палатка бырйыку материаллэсь водостойкостья степеньзэ учконо, со 5000 миллиметрлэсь ӧжыт медаз луы. Со сяна, палаткалэсь вурысъёссэ но эскерыса басьтоно.

Каркас.

Берло дыре паськыт вӧлмемын фибергласслэсь (алюминий выллем юн стеклопластик) дугаё палаткаос. Соос капчигес но дунтэмгес.

Юнматон амал.

Юнматон амалзыя пумисько внешней но внутренней каркасэн палаткаос. Нырысетӥез ӟечгес врозиськись луэ. Соин сое ӵемысь быръё гурезьёсын, тӧло интыосын шутэтскись туристъёс. Палаткаос люкисько: майыгъёсын юнматӥськисьёслы но каркасэн возиськисьёслы. Йыгмыт возисько, пе, майыгъёсын юнматэм палаткаос.

Вылтус.

Куинь-ньыль сэрего, бочка выллем, «домик», «шатёр», «фургон» - кыӵе гинэ палаткаос ӧвӧл! Быръёно сыӵеоссэ, кудъёсызлэн «липетаз» ву уг люкаськы. Ӝуждалаезъя палатка пичи ке, соку нокыӵе тӧл кышкыт ӧвӧл.

Быдӟала.

Палаткалэн быдӟалаезлы саклык висъяно кӧня ке нуналлы кыре шутэтскыны потыку. Экспертъёслэн кылъёссыя, одӥг адямилэн «кӧлон интыез», тужгес пичи лыдпусэз басьтоно ке, 60 сантимерлы ӵоша. Туристъёс, походэ трос кузя пото ке, шуом, куать кузя, куинь адямилы чаклам кык палатка басьто, куать адями тэрымон одӥг палаткаен уг пайдаясько.

- Палаткалэсь быдӟалазэ вуз карон юртын пыр-поч эскерыса басьтоно. Кык адямилы чаклам палаткаос но, кылсярысь, куддыр ог-огзылэсь висъясько, - валэктэ консультант. – Вуз карисьлы одно ик палаткаез люкаса-сэрттыса возьманы куре. Со шугъяське ке, малпаське: магазинын но мырдэм люкам палаткаез тӥ кырын кызьы люкалоды?

- Нош тусызъя кыӵе палаткаез бырйыса умой луоз, - юасько кенешчиелэсь.

- Туж пеймыт тусо медаз луы: сыӵе палаткаын гужем ортчыт пӧсь уг луы, - вера Андрей.

Собеседникелэн кылъёсызъя, ӟеч палаткаосын кисыос, петляос, москитной сеткаосын укноос луо. Палаткаосын вуз карон висъетысь потыку Андрей вераз на, распродажаослы но, пе, саклык висъяно: кылем арын лэсьтэм палаткаос ӟечлыксыя туэ дасямъёслэсь уг, пе, висъясько, дунъёссы гинэ пӧртэмесь.

Фото: открытый источник.