+17 °С
Зоръёслэн
Антитеррор
Вань иворъёс
Пӧртэм-пӧртэм
2 Июне 2022, 12:55

Вуиз гужем

Нюлэс улэ, арлэн котькуд вакытаз со чебер.

Вуиз гужем
Вуиз гужем

Нюлэсмы арлэн котькыӵе вакытаз шулдыр, тужгес но ӵыдонтэм чеберзэ усьтэ тулыс но гужем. Та вакытэ тылобур­доос но пӧйшуръёс серекъяло, кырӟало, шудо. Котькытын вож пильыс кадь пушъе турын, вӧл-вӧл усьтӥськемын писпу куаръёс. Тани тӥ нюлэс шорын сылӥськоды: азьпалады, кытын ке пыдлон, тодмо «ку-ку! ку-ку!» кылӥське. Нюлэс тырмемын тылобурдо куараосын, нюлэс кырӟа. Кӧня пӧртэм бурдоос­мылэсь «шудонъёссэс» адӟод вожектӥсь нюлэскын! Кӧня шум­потон, кырӟан, шудбур, куректон но адӟе нюлэс!

Шулдыр кызьпу арама но адӟиськиз. Малы ке но татын ваньмыз капчигес кадь. Тӧдьы кызьпуос вискытӥ ин лызгес ад­ске. Котыр тӧдьы: кызьпуос но, солэн вайёсыз но, лӥялъёс но.

Ӵукна. Шунды шорын яркыт чиля лысвуэн шобыртэм вож возь. Син азьын лысву тӧлӟиз. Котыр вӧлскиз сяська но вож турын зын. Ӝужыт но ӵем ту­рын пӧлысь тылобурдо куара­ос кылӥськизы. «Куаж-куаж! куаж-куаж!» - сыномем качыен турынэз турнаны кутскиз куажы. Мынӥськоды со куажгетэм куара шоры, нош пыд куараез кылыса, лэся, куара дугдӥз. Кык-куинь минут но ортчыса ӧз вуы, нош ик азьпалан куажгетыны кутскиз. Нокыӵе лобась тылобурдо ӧз адӟиськы. Куажы ляб лоба, нош туж усто но ӝог бызьылэ.

Тросэз тылобурдоос ӵем, пеймыт тэлез уг ярато. Соин но, дыр, нюлэс дуръёстӥ лулпу, пипу, бадьпу куакъёсын котьку «улон» пӧзе. Шундыё, шуныт, чылкыт. Татын но тылобурдо­ослэн «хорзы» жингыртэ. Таӵе интыосын ӵем гинэ пумиськыло сьӧсьёс но: кучыранъёс, пелёос, уйсыос. Но таосыз адӟиськыны кутско бер ӝыт гинэ…

Нюлэс улэ, арлэн котькуд вакытаз солэн чеберез кыске ас бордаз.

Серафим СОКОЛОВ.

Автор:Марина Николаева
Читайте нас: