-6 °С
Салкым
Антитеррор
Вань иворъёс
Пӧртэм-пӧртэм
29 куартолэзе 2022, 12:20

Мар ярато будосъёс?

Туж яратӥсько сяськаосты. Бакчаын будӥсьёссэ но, укно дурысьёссэ но. Кема аръёс ӵоже ни ӵашъёнсяськаосты (фиалкаосты) будэтыны тыршисько. Но уг пӧрмытӥськы, уг будо соос мон дорын. Нош малы меда? Арлыдоос верало, ваньмыз, пе, килэсь уте. Иське, малы мукетъёсыз ар ӵоже сяськаосынызы шумпотто?

Мар ярато будосъёс?
Мар ярато будосъёс?

Тодосчиослэн кылъёссыя, будосъёс шӧдыны но быгато, дырез, арлэсь вакытъёссэ валало, куспазы верасько, ог-огзэс кышкытлыкъёслэсь утё, адямиослэсь мылкыдзэс но шӧдо. Соос туж ярато, пе, куке соосын верасько, данъясько, куке соосты ушъяло. Оло крезьгурез но валало меда?

Фитопсихологъёслэн верамзыя, ӟеч утялтэм сяна, котькуд будос нимысьтыз саклык висъямез кулэ каре. Кӧня ке бакча сиёнъёс бордын тодосчиос эскеронъёс ортчытӥллям. Таӵе тунсыко суредъёс кылдэмын.

Кияр но ӵужкушман ӟеч будо, куке соосты утялто сабырлы, дыртӥсьтэм арлыдоос. Та будосъёс мултэс куараез уг ярато. Нылпиос шудэм интыын соос уг будо.

Вож будосъёс, тужгес сельдерей, пиосмурт киосты яратэ. Укропе, петрушка, салатэ пиосмурт ву киськаз ке, соос ӝог вылӥе кыстӥсько, ческыт зыно луо.

Кабачок, патиссон кӧй адямиосты ярато.

Курыткушман, редиска тышкаськемез уг ярато. Керетӥсь кузё киосын соос мултэс курыт шӧмо луо.

Косметикаен пайдаяськыны яратымтэ адямиослэн сугонзы удалтэ. Яркыт буёлъёслэсь сугон кышка: шымырске, чурыта, сиыны луонтэм чурыт луэ.

Помидор – шулдыръяськемез, капчи мылкыдэз, крезьгурез яратӥсь бакча сиён. Нуналаз одӥг-кык час шулдыр крезьгур  кылзэм помидор тросгес емыш сётэ.

Кубиста вераськись адямиосты яратэ. Котьмае но со шумпотыса кылзэ.

Картофка утялтэмез туж кулэ уг кары, но ушъямез яратэ. Небыт кылъёстэс ӧд ке жалялэ, сӥзьыл узыр картофка октоды.

Пӧсьтурын, баклажан йӧтылэмез уг ярато.

Бакчаысь будосъёс, яратоно сяськаос пӧлын бергаса, будосъёсты эскерись наукалы оскытэк но уг луы. Будосъёс улэпесь угось. Соос вордӥсько, будо, кидыс сёто, куло. Сяськаосты яратыса утялтӥд ке, соос тыныд тау каро, чебересь сяськаосынызы мылкыдэз ӝуто.

Автор:Миляуша Булатова
Читайте нас в