Кызьы мон губи утчай?

Губияны пичи дыръя ик анай-атай дышетӥзы: ми палан будӥсьёссэ кудзэ сиёно, кудзэ уг яра, кызьы соосты висъяно - ваньзэ валасько ни кожасько вал. Тулыс но, лымы бырем бере ик, губи потэ шуыса, соос уг тодо вал, дыр, соку. Соин интернет вапум вуэм бере кыӵе ке вотэс бамысь Удмуртиысь эшъёсылэсь туспуктэмъёсысьтызы нырысетӥ сморчокез адӟыса, воксё пайми. «Удмуртиын луэм бере, милям но луыны кулэ ук со. Висмы кыдёкын ӧвӧл», - каръяськиз йырам таӵе малпан. Со дырысен вазь тулысысен гужемозь огпол со сморчоксэс асьме палась но шедьто шуыса арлы быдэ ветлӥсько вал нюлэскытӥ но, бусы шоръёсын люкрак будӥсь писпуос вискытӥ но. Ӟучъёслэн «Увидеть Париж и умереть» шуыса веранзы вань. Париже вуылыса мон ӧй кулы. Нош ас синмыным сморчокез адӟи ке, зэмзэ ик  шумпотэменым куло, дыр, шуыса малпасько ни вал. Юалляськыса тодӥ, гуртысьтымы кинъёс со губиез бичало. Веразы, кытынгес со будэ шуыса. Нош сьӧразы ойдо сморчоканы шуыса нокин уг чорты. Асавкаысь апай огпол сьӧразы кутом шуыса оскытӥз вал. Туэ но та губиез шедьтӥсьёсты нюлэскы ӧтьылӥ, нокинлэн но секретэныз (кытын будэ та губи) люкиськемез ӧз пот. Чидан быриз. Соин алигес уж бере потӥ гуртмы вӧзысь Гросйылэ. Со вырйылысен гуртмы кырымпыдэсын кадь адске. Азьпаласен тодӥсько ни вал, сморчок пипуэз но беризез яратэ шуыса. Гросйыллэн улаз ке васькид, беризё интыосысь шедьтод шуисьёс луизы. Кӧня ветлӥ, губи ӧвӧл. Кылдымтэ, дыр, мыным сое бичаны шуыса, мылкыды куашкам ни вал.  «Тазьы ветлыса, гондырен но пумиськод, ява», - ачим озьы кышкам карисько. Гросйыллэн гуртэ васькон сэргысеныз Уядыбаш пала сюрес кошке. Со сюрес кузя кӧня ке мыныны шедьтӥ. Отын беризьёс ӵапак будо. Ма та таӵе? Ас синъёсылы уг оскиськы. Одӥг строчок шедиз. Со но сморчок кадьгес ик тулыс потӥсь губи, но мукетгес. «Строчок будэ бере, оло, сморчок но вань татын?» - шумпотыса пыдлогес но пыдлогес вамыштӥ. Тани со – кема утчам губие. Кузь, тӧдьы куко но кисыриё-кисыриё шляпаё сморчокез адӟыса, мар малпаны ик пайми. Та понна мон кӧня ветлӥ, кӧня турттӥ, кӧня вӧтъёс адӟи, кызьы мон сое бичасько? Шлапаез пичи гинэ, губилэн кукыз гинэ сиымон луоз. Губиез кие ке кутӥськод, кукыз пумен пырдыны кутске, нош пичи шляпаез усе. Тулыс потӥсь губи шундыез яратэгес шуысал. Пеймыт нюлэскысь сое уд шедьты. Огпол сиымон сморчокъёсме бичаса, гурт пала вамыштӥ. Сюлмы буйгаз кадь. Улыны мӧзмыт медаз луы шуыса, табере солы нош маке утчано.