Паймымонэсь пӧйшуръёс

Соос быдӟалазыя ошъёслы тупало. Та пӧйшуръёслэн секталазы одӥг тонналы матэ луэ. Нош сюръёссы 40-50 сантимет­рлы вуо. Соос Африкаын уло. Сямзыя каннаос шыпытэсь но кӧня ке кышкасесь. Асьсэос бадӟым мугоро ке но, сьӧсь пӧйшуръёсты матазы уг лэзё. Каннаос писпуослэсь но куакъ­ёслэсь куаръёссэс сиыса уло. Куаръёс тырмымтэ дыръя ту­рын, будосъёслэн вуо емышъ­ёссы но сиён пӧлазы пыро. Трос ву юо, но кема дыр ӵоже вутэк но улыны быгато.

Каннаос – туж паймы­монэсь пӧйшуръёс. Соослэн йӧлзы трос висёнъёсты эмъ­яны, сутскем, вандӥськем, сӧсырмем интыосты бурмы­тыны яра. Канналэн йӧлыз ӵужмыт, туж нап. Шӧмыз шу­нам мороженнойлэн кадь. Сакыр шӧмыз гинэ ӧвӧл. Пӧсь дыръя ёзвиез сайкыт каре.

Та йӧл ноку но уг сӧриськы. Скал йӧл чырса но собере сӧриськыны кутске. Нош канналэсь олокӧня ар ӵоже возьыны луоз. Бен, со чырса, но ноку уг сӧриськы. Зэмзэ ик, паймоно кадь, бен-а? Тросэз тодосчиос сое тазьы валэкто: та йӧлэ ше­дись вань бактериос соку ик быро, йӧлэз сӧрыны уг быгато.

Канналэн йӧлаз, скал йӧлын сярысь, кык-куинь пол­лы тросгес жирез, белокъё­сыз, сакырез. Канна йӧллэсь эмъяны быгатэмзэ врачъёс эскеризы ини. Тужгес юн сутскем интыос но, соосты канналэн йӧлыныз коттэм бинетэн биниськод ке, то­лэзьскын чылк-чылк бурмо. Кӧтпуш висёнъёсты быдэсак бурмытытозь эмъян понна, одӥг адямилы араз дас литр таӵе йӧл кулэ.  

Каннаос 15-20 ар пала уло, соос одӥг часкын тужгес троссэ 40 иськем ортчыны быгато. Мугорзылэн секталаез 940 килограммлы вуэ, нош быдӟалазы – 1,6 метрлы.     

Суред интернетысь басьтэмын.