"Садъёсын ӵук ӟардытозь ик уӵыос чирдо"

Нош нюлэскын кыӵе умой! Шоканы ик капчи. Кечсин сяськаоссэ куштыны дасяськем ни. Али чебер дырыз лызчыснолэн. Учке ай, кыӵе улэ огез азьпала мычыса кадь лемлет-лыз сяськаоссэ. Азьпала вамыштӥ. Италмас сяськаез пумитай. Со но тани-тани усьтӥськоз, ӵуж сяськаосыныз пиштыны кутскоз. Али бездыт на ай. Йырме вылэ ӝутыса, ӝужыт кызлэн вайёсыз бордысь пичи дырме шедьтӥ - кызаузыосты. Ми палан соосты кызузы шуо. Сокем узылы кельшо уго соос. Тодам лыктӥз шур дурын, кызузы сиыса, ӟазегпиосты возьмаммы.

Толон уӵы чирдыны кутскиз. Табере со уйбыт пӧртэм гуръёссэ кисьтоз, толэзь пала. Кылзы но кылзы. Нуназе сое кылыны уг луы мукет тылобурдоослэн куараенызы. Чирдыны соос шуныт палась вуэм беразы 3-5 нунал ортчыса кутско, куакъёсы но писпуосы куаръёс поттэм бере.

Уӵыен трос гинэ калык чакланъёс герӟаськемын. Уӵы чирдыны ке кутскиз, кизён-мерттӥськон ужъёсты кутсконо, кезьытъёс кыошкыт уз луэ ни. Уӵы умой-умой чирдэ - тулыслы бырон, гужемлы вуон пала. Уйбыт уӵыос дугдытэк ке чирдо, ӵуказеяз шундыё куазь луоз. Кикылэсь азьло уӵыез кылӥсьёслы удалтоз - гужемзы умой ортчоз.