+6 °С
Салкым
Антитеррор
Вань иворъёс
Пӧртэм-пӧртэм
14 куартолэзе , 14:30

Тюрагай

Шаертӥ тулыс вамышъя. Инме ӝутскись шунды зарни сиоссэ пазяса дуннеез сайкатэ. Котырын шыпыт. Ыркыт тулыс тӧл гинэ дырын-дырын бам йылъёсы йӧтскылэ но …кытчы ке ыше. Нош ик шыпыт луэ. «Тюрли-тюрли-ли-ли-лю…»  син сузёнтэм вылӥын, шуом, ин пыдсын, азвесь гуръёс кылӥськизы.

Тюрагай
Тюрагай

Озьы кырӟа тюрагай, тулысэз данъяса сямен. Шулдыр кырӟанэз пыр со котькинлы вера кадь котырез улӟытӥсь, вожектытӥсь тулыслэн вуэмез сярысь.

Вылтуссыя тюрагайёсты пӧртэм видъёслы люко. Нош улон амалъёссыя соос уг висъясько. Котыре тужгес паськыт вӧлмемын асьме палан пумиськись бусыын улӥсь тюрагай (полевой жаворонок). Матысенгес тодматскоме со кырӟась эшенымы.

Тюрагай тӧдьы, пурысь но гордалэс курень тусъёсты бордаз басьтэм. Бурдъёсаз сьӧд тус но пумиське. Солэн улон интыез Крымозь но Кавказозь кыстӥське, кытын вань бусыос, степьёс. Тюрагай писпу вайёсы ноку уг пуксьы. Нош музъем вылтӥ туж сэзь бызьылэ. Со асьме доры вазь тулыс вуэ.

Тодосчиослэн эскеронъёссы возьмато: нырысь вуо айы тюрагайёс, бергес – мумыосыз. Собере паръёслы люкиськыса, музъем вылэ асьсэлы кар тупато. Тюрагай 4-5 пуз понэ. 14-15 нуналскын тюрагай пиос пото. Тютюосты нымы-кибыосын сюдо. Пыдъёссы юнмам бере, 9-10 нуналскын, соос карысьтызы кошко. Асьсэос сиён шедьтыны дышемзы бере, мумы тюрагай кыкетӥ ползэ пи поттэ.

Тюрагай – визьмо тылобурдо. Шулдыр гурзэ кисьтыса омырын поръямез бере, со улӥе ваське. Ноку но карез вӧзы уг пуксьы, 10-15 метре палэнэгес интыяське но карез доры турын пӧлы ватскыса мынэ. Со туж чырткем, синйылтыны но уд вуы.

Тюрагайлэсь чирдэмзэ номырин уд ӵошаты - солэн кырӟанэз туж аспӧртэм. Вылӥын кылӥськись жингрес гурез шолам куара воштӥз, со дыре ик со мӧзмыт гурлы пӧрмиз, кӧня ке дыр ортчыса, сое, кожалод, зол оркестр воштӥз…

Пӧсьтолэзьлэн шорысеныз тюрагайлэсь чирдэмзэ шер кылод, нош гудырикошконын со чылкак чалмытске. Куарусён толэзьлэн пумаз тюрагай шуныт палъёсы лобӟе.

Фото: открытый источник.

Автор:Миляуша Булатова
Читайте нас в