Ӝӧк выламы - финикъёс

Куасьтэм финикъёс син шорам йӧтӥзы. Вуз карись соослэн пайдаё луэмзы сярысь мадьыны кутскиз: «Трос шаеръёсын финикъёсты тазалыкез кыдатӥсь но улонэз кузятӥсь емышен лыдъяло. Верало, Китайын, пе, вань сыӵе долголжительёс, кудъёсыз сиён пӧзьтыкузы, пӧракузы котьку финикъёсты куто. Диетологъёс но сакыро сиён интые финикъёсты сиыны ӵекто. Уго соослэн калоризы ӧжыт.

Эмчиослэн кылъёссыя, вирын сакыр ӧжыт ке луэ, кӧт сюманы кутске. Нош кӧня ке финикъёсты синмед бере, кӧт сюмамед быре. Та емыш бордын аминокислотаослэн 23 пӧртэм видъёссы лыдъясько. Соос йырвиымез ужато, кужым сёто. Кылсярысь, 200 г финик басьтыса, тӥ оломар мында минералъёс, витаминъёс басьтӥськоды. Тодосчиос лыдъяло, нуналаз 10 финикъёсты сиид ке, мугорыд суткаяз тырмыт луись магниен, меден, сераен узырме. Та емышъёс тазалыклы кышкытлык ваись бактериосты, микробъёсты но паразитъёсты быдто, аппетитэз ӝуто

Финикъёс – космонавтъёслэн номырин воштыны луонтэм сиёнзы но эмъюмзы. Емышын витамин А трос лыдъяське, со зрениез ӟечомытэ. Зэм, финикъёсты сиытэк но улыны луэ. Но сиён рационазы соосты ӵем кутӥсьёслэн тазалыксы трослы юнгес луэ. Шокан, сердечно-сосудистой висёнъёсын, анемияен, пыктосъёсын курадӟисьёслы соосты сиыса умой луоз. Финикъёс шыдпурты висёнъёсты но палэнтыны юрттозы. Нуны вордэм нылкышноос понна но финикъёс пайдаё сиён луо. Огкылын вераса, котькинлэн ӝӧк вылаз та емышъёс мед луозы».

Магазинысь ӝыны кило финикъёсын потӥ. Вуз карисьлэн мадемезлы, емышъёс сярысь ваньзэ тодэмезлы пайми. Доре бертыса, интернетысь финик пальмалэн емышъёсыз сярысь лыдӟи. Вуз карись ваньзэ шонер верам.