Кыӵе кион кужмогес?

- Мынам улонэным тодматскид ини, табере ас сярысьтыд вера, - шуисько Ансарлы (нимез воштэмын).

- Мар веранэз, - синъёссэ палэнэ басьтыса мур лулӟиз со. – Улон шуыны луэ меда мынэсьтым улонме. Ужысь монэ уллязы. Кузпалыным люкиським. Мон сое валасько. Ма, кинлы кулэ нунал ӟенелик утчась адями? Али со Нефтекамскын улэ.

- Нош пиед?

- Пиелэн но монэным пумиськылэмез уг поты. Араз кык пол гинэ мон сое адӟисько – Выль ар праздник азьын но вордӥськем нуналаз. Пичигес дыръякуз ӵем ветлӥсько вал, со монэ шумпотыса пумиталляз. Нош сизьыметӥ классэ потэм бераз шуиз: «Мынам аракы зын пыӵам атаен пумиськылэме уг поты. Тон монэ но анаез курыт вулы воштӥд. Эшъёсы но тонэ трос пол юэмен адӟылӥллям ни. Тынад атаед юись-а шуыса юало. Возьыт мыным». Пиелы пумит вазьыны ӧй быгаты. Со шонер вера. Мон семьяме ӟенеликлы воштӥ. Ачим но валасько, озьы улыны уг яра шуыса. Нош ӵукна султӥсько но, пыдъёсы вузкарон юртэ нуо, «сю грамм» утчасько.

- Нош кытын тон улӥськод? Гуртын-а? Анаеныд?

- Уг. Со пересь ини, ӵем висьылэ. Анайлы капчи шат юись пизэ нунал адӟыны? Апае дорын улӥсько. Со монэ жаля, тышкаське но, соку ик вунэтэ. Ураме, пе, уд улля ас вындэ. Юыса мон уг куаретӥськы, изьыны выдӥсько.

Вераськон куспын тодмоелы жингыртӥсь луиз. Милям сюресъёсмы люкиськизы.

Улон сюрес. Кыӵе гинэ уг луы со?! Ансарлэн верамъёсыз пумысен кема малпаськи. Озьы но йылпумъян лэсьтыны ӧй быгаты. Со ас янгышсэ вала. Нош малы улонзэ уг вошты меда?

Тодам лыктӥз одӥг притча. Арлыдо индеец внукезлы улонлэн зэмлыкез (истина) сярысь, пе, маде.

- Котькуд адями пушкын нюръяськон мынэ, пие. Со кык кионъёслэн жугиськемзы выллем. Одӥгез кион урод, лек сямъёсты возьматэ: вожъяськон, пӧяськон, вожан, эгоизм, амбициос. Нош кыкетӥез кион – со ӟечлык: яратон, тупаса улон, эшъяськон, оскон, шумпотон, зэмлык… - валэктэ арлыдо песятай.

Егит пияш мур малпаськонэ усе. Ӧжыт пукемез бере, со песятаезлэсь юа:

- Нош кыӵе кион кужмогес?

Пересь индеец ымпумыныз гинэ пальпотыса шуэ:

- Котьку ворме со кион, кудзэ тон сюдӥськод.

Фото: открытый источник.