Дасяськом ческыт сур

Газетмес лыдӟисьёсты Татышлы ёросысь Арибаш гуртын улӥсь Лилия Гараевалэн сур пӧзьтон амалэныз тодматӥм ни вал. Калтасы ёросысь Бадӟым Качак гуртлэн юбилеяз веръям мукет усточи апайлэсь – Бадӟым Качак гуртын улӥсь Светлана Арслановалэсь – пӧзьтэм сурзэ. Сое но пӧсь куазен туж ческыт карыса юим. Света апайлэсь рецептсэ кури. Соин тӥледыз но тодматэммы потэ.

Сурез дасян понна ӝытазе юмал дасяса кельтоно.  Чиньыез ӵушкасьтэм 3 литр шуныт вулы 0,5 кг ӟег пызь + 0,5 кг чабей пызь (тазэ кулэ ке кариды гинэ). Шуныт вуамы каллен гинэ пызьмес шуккиськом, быректытозяз сураськом. Напчемзэ эскериськом, кисель кадь пӧрмыны кулэ. Туж нап ке луиз, ватсаськом кезьыт ву. Быректэм суретмес тыл вылысь басьтыса, 1 стакан сакыр ватсаськом. Ӵукнаозь мед кыллёз. Ӵукна юмалэ ватсаськом шукыяськыны кутскем маялэз (шуныт вуын сылмытэм 1 бадӟым пуньы дрожжи но 1 чечы пуньы сакыр). Каллен чырсалоз. Ӵуказеяз бадӟым саутын 10-12 литр ву быректытӥськом, отчы пӧртэм турын-куаръёс тыриськом. Турынэз 14-тӥ куартолэзе бичаны тыршисько. Сурлы мынозы эмезь, сутэр, улмопу, вишня, боры, узы куаръёс (пичияк кызьпу  куар, тӧдьы арым (полынь) но дасясько). Бергес вуо беризь сяська, матрушка, зверобой, тузь (трос кулэ луоз), тук (со шӧм ватсан понна гинэ кулэ, тросэн йырез висьытоз). Бичам турынъёсыз веникез кадь керттылыса, пеймыт азьын куасьтоно.

Турын вуэз кема пӧзьтоно ӧвӧл, быректӥз ке, тырмоз. Сӥятыса, дасяськом 1:3 карыса, шӧм (1 литр юмаллы 3 литр ву). Турын вуэз умой сӥсъяськом, юмалэз но дуршлаг пыр поттоно. Шуныт интые пуктыса, шукыяськытозяз возёно.

Шӧммы дась луэм бере сурлы дасям вань ингредиентъёсты ӵош сураськом, чырсгес ке, сакыр йылтӥськом. Дась турын вуэз кезьыт интыын возьыса, кулэ дыръяз сурез выльдыны луэ.

Туспуктэм интернетысь басьтэмын.