Паймымон зоопарк

Отчы вуылон понна, нокытчы мынонэз ик ӧвӧл, пеймыт усемез гинэ витёно, собере вылӥе, инме, учконо. Кин гинэ отын ӧвӧл! Тани кион но дельфин, соос котырын – лобась шыръёс, динозавръёс, тигръёс, жирафъёс… Тӥни Бадӟым но Пичи Медведицаос.

Бадӟымез Медведица  кобылы укша, со сизьым яркыт пиштӥсь кизилиослэсь кылдэмын. Зэмзэ верано ке, ми сизьымзэ гинэ адӟиськом, нош огъя сое сюлэсь трос кизилиос кылдыто. Бадӟым Медведицалэн тужгес бездыт пиштӥсь кизилиеныз азьло синъёслэсь умой адӟемзэс эскериллям. Египетысь Фараонъёс со кизилиез синйылтыны быгатӥсьёсты гинэ охранае ужаны басьто вылэм.

Пичи Медведицалэн тужгес тодмо луись кизилиез – Полярной кизили. Со Уйпалэз возьматэ. Аръёс ӵоже ни со адямиослы сюрес возьматыса пиштэ.

Бадӟым но Пичи Медведицаосты музъем шарлэн котькуд интыысеныз адӟыны луэ, соосты номырин уд сура. Малы меда соосты Медведицаос нималлям?

Вашкала-вашкала вакытэ Грециын Каллисто нимо нылаш улэм. Со туж чебер вылэм. Чеберайлэн вожъяськисьёсыз но трос луиллям. Одӥг нуналэ тушмонъёсыз сое гондырлы пӧрмытӥллям. Зевс но Каллистолы синмаськемын вылэм. Гондырлы пӧрмем мусокаез кулонлэсь утён вылысь, Зевс сое быжтӥз кутыса, инме сэрпалтэм, пе. Соин ик быжыз кузь кыстӥськем, гондырлэн кадь гинэ вакчи кыльымтэ. Нош Пичи Медведица – со Каллистолэн яратоно пуныез. Зевслэн сюлмаськемезъя, Медведицаос пыраклы кизилиё инме улыны интыяськиллям.

Фото: открытый источник.