"Жанетталэн сюлмыз"

Диценра, пе, со. Та трос аръем будослэн (многолетник) пӧртэм видъёсыз пумисько. Со 30 сантиметрысен 1,5 метрозь будэ. Дицентраез утялтонэз секыт ӧвӧл: яратэ со небыт сьӧд сюйез, кезьытъёсы полиэтиленовой плёнкаен шобыртоно, сяськаяськемысь дугдэм бераз, вайёссэ 3-5 сантиметр кельтыса вандылоно. Трос ву киськады ке, дицентралэн выжыез сисьмоз. Пӧртэм сортъёсыз пӧртэм сямен сяськаяло, куд-огез - куартолэзь кутсконысен инвожолэн пумозяз, куд-огез – гужемлэн шорысеныз бер сӥзьылозь.

Интернет бамъёстӥ «калгыса», дицентра сярысь трос тунсыкозэ тодӥ. Со сяськалэн кылдэмез сярысь легенда но калыкын улэ вылэм.

Жанетта нимо чебер нылаш нюлэскы, пе, йыромем. Солы дораз бертыны юрттэм валэн егит пияш. Кошкыкуз, со нылашез чупаса кельтэм. Жанетта солы синмаськем, уй но нунал пияшлэсь лыктэмзэ витем,

Одӥг нуналэ нылаш гурт пумысь сюан кортежез адӟем. Солэн азяз – йыромем Жанеттаез дораз вуттэм пияш мукет нылашен. Жанетта музъем вылэ пограм, вӧсь луэмлы чидатэк, солэн сюлмыз пилиськем. Со интые дицентра ӝужам. Та сяськаез калыкын «пилиськем сюлэм», «Жанетталэн сюлэмыз», «сюлэмлэн сяськаез» шуыса но нимало, пе.