Ӟильыр-ӟильыр куашето ваёбыжъёс

Ас поннам олокинэ тышкаськыса, кык пол-а, куинь пол-а корказьме миськи ни. Малы ке шуоно, миськыса гинэ вуттӥсько но, отчы ик миськем выже куасьмем дэриесь но куроесь луэ. Азьвылгес наялтӥ вал ини, азбартӥмы маке туж ӵем ваёбыжъёс лобало шуыса. Кӧня ке ар талэсь азьло турын сигамы вал соослэн карзы. Турынэн тырмытэм сигысь сое коӵышмы тарказ. Бурдоос интызэс воштоно луизы, но шуныт пала лобон азязы одно ик азьвыл доразы вуо, азбартӥ котырскыса, ез вылын пукыса кошко вал. Педлань корказьлэсь борддорзэ, оло, сигамы улӥсь тылобурдоослэн ик пиоссы пузкарлы кельыштыриллям. Нош малы али соос кар лэсьто, паймымон. Уродлы ӧвӧл, дыр, дорамы озьы тылобурдоослэн каръяськемзы шуыса, оскеме потэ.