Кык кызьпу

Автобус ширтэ, капчи тӧл выллем, азьпала мынэ. Машалэн туннэ шулдыр нуналэз, угось со вань экзаменъёссэ сётӥз но али агаез доры куное дыртэ. Кыӵе кема соос ӧз адӟиське ни, быдэс кык ар! Тани со вуоз, ӟыгыртоз сое, бам вылтӥз синкылиез погыльскоз! Кыӵе кема возьмам нунал вуэ!
Машалэн син азяз - пичи дыръязы ӵошен бызьылэмзы, шудэмзы, исаськемзы. Нош одӥг пол соос, нюлэскысь вайыса, бакча сьӧразы кык кызьпу мерттӥзы. Одӥгез, пе, Саша луоз, мукетыз - Маша. Туж мусо будӥзы та кызьпуос, агаен сузэр выллем. Котькыӵе шуг-секытэ но, тӧласькыку но соос ӵошен будозы, ӵошен луозы.
Ортчизы аръёс, будӥзы пиналъёс. Машалэн агаез кышноеныз ӵош палэнысь каре улыны интыяськиз, соин ик туж шер гуртаз бертылӥз. Сузэрез доры ноку но вуылыны ӧз пӧрмылы. Маша вала: агаез ужа, выль квартира басьтыны коньдон люка. Кытысь солэн дырыз луоз? Нош нылаш школазэ йылпумъямез бере кыдёке ӧз кошкы, дышетсконзэ азьланьтыны матысь городэ гинэ мынӥз. Машалэн агаез доры кемаласен вуылэмез потэ вал, коньдонэн гинэ шуг-секытъёс кылдылӥзы.
Вокзалэ вуыкузы, куазь ӝомыт вал ини. Маша сумкаоссэ басьтӥз но автобусысь потӥз. Кӧня адямиос, йыромод татын! Нылаш синъёсыныз ӝог гинэ утчаськиз: нокин тодмо уг адӟиськы-а? Сюлмыз но кушерскиз, оло, агаез вунэтэм пумитаны лыктыны… Агаезлы жингыртыса утчаз - соиз телефонзэ уг куты. Ма кароно? Машалэн синкылиосыз питыраны кутскизы. Кык час возьмамез бере со ачиз агаез доры мыноно кариськиз. Такси ӝог гинэ вуттӥз агаезлэн корка дорозяз.
Ӧссэ усьтӥз Люда кенакез.
- Маша? Тон кытысь-о вуид?
- Ма, мон верай вал агаелы, лыкто шуыса. Кытын нош со?
- Саша, чаль ай татчы! Тынад сузэред лыктэм, нош тон ӧд но вера мыным.
- Маши, чылкак вунэтӥськем лыктэмдэ, - коридоре Саша потӥз. - Вождэ эн вайы. Пыр ойдо, ма ӧс сьӧрын сылӥськод…
Автобус ширтэ. Маши гуртаз бертэ ни. Агаез дорысь со ӵуказеяз ик кошкиз, угось татысь аслэсьтыз агайзэ со ӧз шедьты ни… Нылашлэн пушкыз чигемын. Котьмае чидалод та улонын, но матысь адямиед мурт луэ ке - со валантэм…
Гуртэ вуыкуз, куазь тём-тём пеймыт вал ини. Анаез, нылызлэсь бертэмзэ тодыса, пыжиськем, мунчо эстэм.
- Тонэ лумбыт возьмасько ини, нылы, ма, кызьы агаед доры ветлӥд?
- Туж умой кунояй. Корказэ возьматӥз, каретӥ поръям, олокытчы но вуылӥм…
Маши мадемезъя анаезлэн бамъёсыз кузя быльырась синкылиосты синйылтэ. Со - шудо синкылиос. Анай нылпиосыз понна шумпотэ.
Бакча сьӧрын кык тӧдьы кызьпуос вайёсыныз шаугето. Кыдёкысен учкыса, малпалод: ӝужытэз покчизэ тӧллэсь шобыртэм, кезьыт сильтӧллэсь уте. Кык кызьпуос, агаен сузэр кадь, котьку ӵошен луозы, ог-огзылы юрттыса улозы. Нош улонын куддыръя озьы уг луы вылэм.
Елена НАБИУЛЛИНА.

(Суред интернетысь басьтэмын).