Малы коӵыш сиськемез бере пылаське

Ожо вылтӥ чульк-чульк! тэтчаса ветлэ, ю тысь шедьтэ но кокчаса сие. Нош сэргысен сое кузёлэн коӵышез учкыса улэ. Учкиз, учкиз но ӟольгыри вылэ тэтчиз ук! Сое бурдтӥз зӥбиз но шуэ:
- Мон али ческыт сисько ай!
- Дугды ай, дугды, коӵыш апай! – кесяське ӟольгыри. - Тон монэ сиыны малпаськод-а?
- Ма, мон тонэныд шудыса улом шат? – мыргетӥз коӵыш, ӟольгыриез сиыны дасяськиз.
- Ӧжытак ке но возьдаськы ай, коӵыш апай! – нош ик чильыктэ ӟольгыри. – Тон пыласькыны вунэтӥд ук! Тынад кузёед но, солэн кышноез но, дуннеысь вань адямиос но азьло пыласько, собере сисько. Тон сое уд тодӥськы шат?
- Зэм но ук! – шуиз коӵыш, ымнырзэ ӵушылыны пыдзэ ӝутӥз.
Нош ӟольгыри соку ик палэнэ тэтчиз. Бурдъёссэ вӧлъяз но лобӟиз.
Коӵышлэн туж вожез потӥз.
- Озьы уз луы! Табере монэ уд пӧя ни! – шуиз коӵыш. – Адямиос асьсэ сямен мед карозы, нош мон азьло сисько, собере пыласько.
Со дырысен дуннеысь вань коӵышъёс сиськемзы бере пыласько.
(Басьтэмын «Удмурт кыл» книгаысь).