Укно дураз будӥсь сяськаосыз али но пушъё

Кышномуртлэн гроб выжыяз вань нылпиосыз люкаськизы. Соос бӧрдо, кылало-бурало. Анайзылэсь мугорзэ быдэсак сяськаосын шобыртӥзы.
… Олина вить нылпиоссэ туж секыт будэтӥз. Кузпалэн солы ӧз удалты. Нырысь сое шудон пӧлысь бускель гуртэ лушказы. Серекъян-лӧптылон бордысь кылдэм семьялэн улон сюресэз кема ӧз кыстӥськы. Олина пичи пиеныз анаез доры бертӥз. Кыкетӥ кузпалыз но солэн гуртысь вожъяськымон эмеспиос пӧлысь ӧз луы: кышно вошъясь вал со. Витетӥ кышно луыса пыриз со Тэмыр доры.
Гожтэмез-а озьы шуод, кыллы вольыт-а меда вал Тэмыр? Кин тодэ ини. Нунал бӧрсьы нуналъёс ортчылӥзы. Олина ньыль нылпи вордӥз.
Юись воргоронэн нылкышно шудо луоз шат? Пиосмурт ужез но Олина ачиз быдэсъяз. Тэмыр вожаны но муг шедьтэ вал. Кизэ ӵем ӝуткалляз кышноез вылэ. Олиналэсь бадӟым пизэ Тэмыр но, солэн анаез но мултэс каризы. Ӵужаез дорын будӥз со. Сюлэмызлэн огсэргаз мертчем шырпу кадь улӥз, уйёсы зубласа висись яра кадь луиз пиез сярысь малпанэз.
Нылпиосыныз гинэ шудо вал анай. Вань сюлэм шунытсэ сётыса будэтӥз со мусооссэ. Мукетъёслэсь кем медаз луэ, чебер мед адӟиськозы шуыса, аслыз выль дӥськут уг басьты вал. Олина нылпиоссэ дӥсян сярысь сюлмаськиз. Ӧвӧлзэ но вань карыны тыршиз.
Нылпиосыз семьяосынызы улыны кутскем бере но маин быгатӥз, юрттыны тыршиз. Сӥль, шуккем вӧй, йӧлвыл – ваньзэ дася вал анай. Городысь нунокъёссэ кузьымъёсын но шумпоттылӥз, пенсиез пичи ке но вал. Соослэсь но тросгес ачиз шумпотылӥз. Нылъёсызлы кузпалъёсынызы удалтӥз. Кенэныз но Олина капчиен огкыл шедьтӥз, ог-огзэс валаса улӥзы.
Улонэз кык пол улыны уг луы, куд-ог янгыш но тупатонтэм луэ. Вӧзаз будымтэ пиез азьын Олина куддыр янгыше усем адями выллем лулскылӥз. Пиез визьмо будӥз, анайзэ ноку ӧз пыкылы. «Ӟеч мед улозы паръёсынызы. Мар соосыз висёнъёсыным сюлэмшугъяськытод? Висё но, ортчоз ай», - малпа вал Олина. Ӧз, ӧз ортчы висёнэз…
Куинь ар ортчиз ни Олиналэн кулэмез дырысен. Сотэк сяськаяськиз мерттэм льӧмпуэз. Укно дураз будӥсь сяськаосыз но Олина улэп дыръя кадь пушъё.
Пальпотыса учке Олина памятникысьтыз фотояз. Шудо дыръяз туспуктэмзэ бырйиллям нылпиосыз. Синкылиос каллен васько бам кузя…
- Анай, кыӵе тон уд тырмиськы милемлы. Улэп дыръяд ӟеч кылъёс вераса вуим-а меда? Ӟазег сӥлен пӧзьтэм ӝукедлэсь ческыт шӧмзэ валаса сиим меда? Малы улэп дыръяд ӟыгыртыса гадь бордамы ӝиптыны, чупаны кер потылӥмы? Чупа вал, ӟыгырты вал, анай ӧвӧл ни.
Сакина СУФИЯРОВА.
Калтасы ёросысь Бадӟым Качак гурт.

(Материал газетэ 2018-тӥ арысь 22-тӥ шуркынмонэ потэмын).