Ас шудэд – аслад кияд

Котькинлэн кылэмез вань, дыр, улонын пумиськись сьӧд но тӧдьы гожъёс сярысь. Уката ик со гожъёс сярысь малпаськыны кутскиськод шуг-секытъёс, куректон дыръёс луыку. Яке вормонъёс утыку, шудо минутъёсы…

Проблемаос, мон малпасько, улонын котьку пумисько. Соос «быдӟалазыя» гинэ висъясько кадь: кудӥз-огез бадӟым луэ, кудӥз-огез – пичигес. Шуг-секытъёсты огшоры гинэ, жуг-жагез выллем, музъеме согыса кельтыны уг луы. Дырдэ гинэ юнме быдтод. Кылдэм проблемаез ӧд ке палэнты, со одно ик «ӝужалоз». «Емышъёсыз» эшшо но узыргес луозы.

Вормонтэм, шуг-секытъёсысь потыны сюрес шедьтыны луонтэм проблема дунне вылын вань меда? Пыраклы ыштэм адямиосты гинэ сопал дуннеысь берыктыны, улӟытыны уг луы. Мукетсэ вормыны луоно.

Трос дыръя асьмеос, адямиос, чик ӧвӧлтэмлэсь но бадӟым ужпум кылдытӥськом. Кылсярысь, тодмое ӝожтӥське, зарни пель угыосы, пе, ӧвӧл. Басьтыны коньдонмы, пе, уг тырмы. Со пумысен кузпалыныз олокӧня пол куаретӥллям ни. Мон солы шуисько: «Тынад мукет проблемаосыд ӧвӧл, лэся. Кинке но няньлы, йӧллы коньдон шыръян сярысь малпаськыса улэ. Нош тон?»

Секыт дыръя шудо вакытъёс сярысь малпад ке, кылсярысь, яратонэн пумиськон, яке сюан, яке нуны вордӥськон дыр, ымнырын пальпотон кылдэ. Кема пуки со сьӧд но тӧдь гожъёс сярысь малпаськыса. Таӵе малпанэ вуи: мынам шудэ – мынам киям. Нокыӵе сьӧдо-тӧдьыё гожъёс улонам уг пумисько. Котькуд адямилэн аслаз гожез, солы котькыӵе тус пыртыны луэ. Яркыт буёлъёсын пайдаяськид ке, улонэд но яркыт сяськаялоз!!!

Та гожтэмме лыдӟемды бере, одно ик малпаське: марды вань тӥляд туннэ нуналэ.

Фото из открытых источников.