Кикы силе тӧлтэм дыръя

Кикылэсь силемзэ кылылымтэ адями ӧвӧл, дыр. Нош ассэ бурдоез адӟыны туж ӧжытэзлы шуд усе. Угось кикы туж чакласькись: адямиез но тушмонъёссэ матаз уг лэзьы. Музъем вылтӥ шуген, тэтчаса кадь ветлэ, но туж сэзь лоба. Бурдъёсыз ик кикыез пӧртэм тушмонъёсызлэсь утё.

Та тылобурдо сярысь пӧртэм калык веранъёс вань. Кылсярысь: «Лымы шунамлэсь азьло ик кикы вуэ ке, ар секыт луоз», «Кикы гуртын силе ке, ӝоген гурт быроз» но мукет. Таӵе вераськонъёс кылдэмын вашкала дыръя. Угось песянай-песятайёсмы азьло аръёсы инкуазез туж чаклало вылэм. Нош мынам пичи дыръям, кикылы луыса, юмоке усеме но вань.

Одӥг шулдыр гужем нуналэ гуртмы вӧзысь нюлэскын кикы сильыны ӧдъяз. Туж кельшиз мыным солэн куараез. Соин ик ассэ бурдоез но адӟеме потӥз. Сыӵе чебер силе бере, ачиз но синмаськымон луыны кулэ, малпай мон. Шады шурез выжыса, нюлэскы вамыштӥ. Кема ветлӥ тэлетӥ, нош силем куара пыдлон но пыдлон кылӥське. Ветлонъям кыдёкысь-кыдёкысь Камышонюке вуэмме ик ӧй шӧды. Отысен мон берыктӥськи: Камышонюк сьӧрысь нюлэскы вуылэме ӧй вал на, соин ик кӧшкемыт потӥз со мыным. Доре бертыса, ӵужайлы нюлэскы ветлэме сярысь мади. Нош со монэ тышкаськиз. «Шузи тон, кикыез утчасьёс шудзэс келяло», - шуиз.

Та учыр бере трос кылылӥ на кикылэсь силемзэ, нош ассэ бурдоез куатетӥ классын дышетскыкум адӟи. Пӧсьтолэзе вал со. Ӵапак со аре агае Бирск городысь пединститутэ пырон вылысь экзаменъёс сётъя вал. Одӥг пол вазь ӵукна мон сое Янаул дорозь, Бирске ветлӥсь автобуслэн нырысетӥ рейсаз мед вутскоз шуыса, мотоциклэн келяй. Гуртэ бертыкум, пудоос но возь вылэ потэмын ӧй вал на. Нош мон, иземе уг поты ни шуыса, кияр вылэ ву киськаны бакчае вамыштӥ. Кенер пыр кубиста убо вылысь нумыръёсты кокчась пурысь тылобурдоез синйылтӥ. Тодмай: со – кикы. Соку мон кык полэс шумпотӥ. Угось кикыез нырысьсэ адӟи. Собере ваньмызлы тодмо, дыр, кикыос нюлэскысь пӧртэм нымы-кибыосын, тужгес но гоно нумыръёсын, кӧтсэс тыро шуыса. Нош кубиста вылысь нумыръёсты сиемзы сярысь туж ӧжытэз тодэ, дыр. Оло, нокин но уг. Соин ик мон соку аслым «Америкаез усьтэм» кадь потӥ, ява. Туж пайми.

Кикыос сярысь рос-просгес верано ке, мукет тылобурдоослэсь соос аспӧртэмлыко сямъёсынызы, улон-вылонэнызы но висъясько. Нырысь ик, кикы аслыз кар уг лэсьты. Пи но уг потты. Мукет тылобурдоослэн каразы лушкем пузаса кельтэ. Озьы кикыпилы мукет анай вӧзын быдэсмоно луэ. Со сяна, кикыпи сюрмумыезлэн пиосызлэсь азьлогес ӵогиське но мукет нуналаз ик вань пузъёсты куяны тырше. Тодосчиос али ке но паймо кикыпилэн сыӵе сямызлы. Угось кикыпи аслэсьтыз секыт арбериосты но ворме. Инкуазь солы кык-куинь нуналлы гинэ сыӵе кужым сётэ, бӧрысь тылобурдопи катьтэмме. Соин ик, со дыр куспын карез бушатыны уг вутты ке, сюрвынъёсыныз огазе кыле. Озьы ке но куштытэк кылем бурдопиос тросэз сютэм куло, ӝог будӥсь кикыпи вань сиёнзэс сие.

Сильыкуз кикылэн выросъёсыз но мукет тылобурдоослы уг кельшо. Тылобурдоослэсь кырӟамзэс адӟемды вань, луоз. Басьтом шырчикез ик. Кырӟакуз солэн ньылоныз кӧня ке будэ, бурдъёсыз выро, нош ымыз усьяське. Кикы но озьы ик силе кожаськоды-а? Уг. Сильыкуз со гонзэ пештыртэ, бурдъёссэ уллань лэзе, быжзэ кӧня ке ӝутэ, йырзэ азьпала мыче, нош ымзэ пытса. Ньылоныз гинэ кӧня ке будэ.

Тулыс лымшорысь вуэмез бере ик, айы кикы аслыз нимысьтыз инты быръе но мукет айы эшъёссэ отчы уг лэзьы ни, туздыре. Нош мумы кикы котькытчы вуэ, собере со сильыны уг быгаты. Вераны кулэ, айы кикы куартолэзе, шулдыр, тӧлтэм нуналъёсы гинэ, силе. Соку соослэн сюан дырзы луэ угось. Нош сӥзьыл, лымшор пала лобӟон азязы, кикыос гурланы кутско. Озьы, пе, соос пиоссэс утчало. Адямиос, со гурламез кылыса, «кикы шузимем ини» шуыло.

Тӥни сыӵе со – кикы. Кикы сильыку, кин уг яраты меда «кӧня ар улыны кылиз на» шуыса тунаны. Берло дыре кикыос но ӧжытгес силё, лыдзы кулэсме. Уго нюлэсъёсты корало, собере инкуазь но кырсёмегес. Яратэ но уте кикыосты, соослэн куд-ог сямъёссы уг ке но кельшо. Марлы ке но тылобурдоос дунне вылэ кылдӥллям ук. Соос музъем вылысь быризы ке, улыны но мӧзмытгес луоз.

Артём НИКИТИН.

Пермь шаерысь Куеда ёросысь Гожан гурт.