Тямыс пӧртэм витаминъёс

Витаминъёс лул-мугорез таза возён понна кулэ луо. Соин куд-ог дыръя кыӵе ке витамин тырмыт луымтэен,тазалыкмы лябӟе, висёнъёслы сётскиськом, иммунитет лябӟе. Арлэн котькуд вакытаз чырткем но таза луон понна улӥын верам тямыс пӧртэм витаминъёс но юрттозы.

Витамин А лыослэсь но небыт куослэсь тазалыксэс уте. Озьы ик со пиньёслы, синъёслы но кулы пайдаё луэ.Витамин А иммунитетэз юнматэ но синэз уте. Та витаминэн узыр луо йӧл, курегпузлэн ӵужез, куаро бакча сиёнъёс, ӵужкушман, арбуз, дыня, апельсин но гуава.

Витамин В6 пиридоксин нимын но тодмо луэ. Со лул-мугорлэсь иммунной системазэ юнматонын бадӟым инты басьтэ. Со сяна, гормонъёсты регулировать карыны юрттэ. Та витаминэз таӵе сиён-юонъёсысь шедьтыны луэ: тылобурдо сӥльысь, сӥльысь, сезьыысь, авокадоысь но бананысь.

Витамин В9 фолиевой кислота нимын тодмо. Со центральной нервной системаез юнматыны кутӥське. Со сяна, организмзы та витаминэн узыр луэм кышномуртъёслэн нуныоссы но таза вордӥсько. Фолиевой кислотаен узыр луо вож куаро бакча сиёнъёс, сьӧд кӧжы, курегпуз, мус.

Витамин В12 йырсазез утёнын но нервной системаез ужатонын валтӥсь инты басьтэ. Та витаминэз шедьтыны луоз йӧллэсь дасям сиён-юонъёсысь, курегпузысь, чорыгысь но сӥльысь.

Витамин С иммунитетэз ӝутыны быгатэменыз тодмо. Со лул-мугорысь пӧртэм клеткаослэн ужазы пыриське. Соин узыр луо пӧртэм емышъёс. Сое шедьтыны луэ грейпфрутысь, кивиысь, апельсинысь, борыысь но сьӧд сутэрысь. Со сяна, картофкаен брокколи но палэнэ уг кылё.

Витамин Д тырмымтэ дыръя лыослэн юнлыксы быре но остеопороз висён зӥбыны кутске. Соин та витаминэз лыосты но пиньёсты юнматон понна тросгес сиёно. Витамин Д вань йӧлын, курегпузын, чорыгын. Нош эшшо но умойгес луоз кӧня ке дыр ӵоже шунды улын ветлӥды ке.

Витамин Е йырсиез будэтыны, куэз выльдыны юрттэ. Озьыен, со лул-мугорлэсь пересьмонзэ но ӝегатэ. Витамин Е асьмелы таза гижы, йырси но ку сётэ. Со сяна, синэз но мусэз уте. Сое вань емышъёсысь но бакча сиёнъёсысь шедьтыны луэ.

Витамин К - со калий. Со вирез ӟеч бергатыны но лыэз юнматыны юрттэ.Со сяна, сюлэм висёнъёсты но палэнтыны быгатэ. Таӵе витаминэн узыр луо вож куаро бакча сиёнъёс, соялэн но чорыглэн вӧйёсыз.

Та витаминъёслэн тӥляд лул-мугордылы кулэ луэмез сярысь ӟечгес тодон понна эмчиослы вазиськоно. Калык амалэн эмъяськонлы оскиды ке но, эмчиосын кенешон мултэс уз луы.

Дасяз

Марина НИКОЛАЕВА.

Читайте нас:

Новости партнеров

Лена ханым: "Улымды онотмайҙар"

На уровне молекул

Салкын тигәндә мунча керергә ярыймы?

Учредитель: Агентство по печати и средствам массовой информации Республики Башкортостан

Регистрационный номер: Свидетельство ПИ № ТУ02-01536 от 6 июня 2016г. Главный редактор: Нигаматуллина Оля Борисовна

Газета "Ошмес" - общественно-политическая, социальная, культурно-просветительская газета удмуртов Республики Башкортостан.

Телефон

Телефон+7 (34778) 2-11-89, 2-18-71

Электронная почта

[email protected]

Адрес

452830, Республика Башкортостан, Татышлинский район, с. Верхние Татышлы, ул. Ленина, д. 91