+9 °С
Салкым
Антитеррор
Вань иворъёс
Пӧртэм-пӧртэм
7 ноябрь 2019, 14:15

Пал тури

Куатетӥ шуркынмонэ БР-ысь культура удысысь сӥё-дано ужасьлы, шаерчилы, гожъясьлы, "Ошмес" газетлэн нырысетӥ валтӥсь редакторезлы Андрей Васильевич Гильмаевлы 82 арес тырмысал. Ӵектӥськом солэн "Пал тури" веросэныз тодматскыны.

Мардан кема кыллиз валес вылаз. Кышноез, ас понназ нукыртыса, олокӧня пол со вӧзтӥ ортчиз, нош вазьыны ӧз дӥсьты. Картэзлэсь сямзэ тодэ угось, макмырез дыръя солы номыр верам уг яра.
Нылпиоссы школае кошкем бере гинэ вырӟиз Мардан. Азбаразы потыса, гид сьӧрысьтызы толло ватоссэ шедьтӥз, ӝыныя кылем виназэ дурыныз ик кымалтӥз. Педлон кӧня ке котыръяськиз на, собере дораз пыриз, дӥсяськиз но кияз пыӵал кутӥз. Соку гинэ вазиз солы кышноез:
- Бон кытчы мынӥськод со кудӟем йырыныд? Кӧня нунал небӟыса ветлӥськод ини!
- Ничего! Нюлэскын макмыр но быроз. Тыныд тани тылобурдо сӥль ваё.
- Ваёд тон, ваёд. Оломар адӟытод али… Кушты со пыӵалдэ, кияд воземед но уг луы ни ук тӥни.
- Мынам-а?
…Кызьы озьы кемдӥз меда?
Ӵапак гурт вадьсын туриослэн кык ваё уллёзы адӟиськиз. Ӟырдам пӧйшурась кема мертаса ӧз улы, пыӵалзэ урдӥз но ыбиз. Соку ик улӥетӥ лобись тылобурдоос пӧлысь одӥгез усьыны кутскиз. Ӧз адӟы ни Мардан уллёлэсь сураськемзэ, ӧз ни кылы туриослэсь сюлэмез чигымон кесяськемзэс. Сӧсырмемезлэсь бакча беразы усемзэ учкиз но корказы пыриз.
- Адӟид-а? – ушъяськиз со кышноезлы. Собере сумказэ кутӥз но ураме потӥз.
Нюлэс тыос котырысь со бер ӝыт гинэ бертӥз. Номыртэк, буш киын вуиз. Мылкыдыз туж секыт. Вурамысен пизэ адӟиз но кеськиз:
- Мар бызьылӥськод на, изьыны кулэ ӧвӧл-а тыныд?
Пиез ӧз куареты. Со огназ ӧй вал, матынгес эшшо кӧня ке адямиос сыло. Ваньзы инме учкыло: отын одӥг тури котыръяське, чусомем омырын солэн куараез кыдёке чузъяське.
- Тон-а ыбид солэсь парзэ? – меӵак юаз бускель юртысь пересь кышномурт.
Мардан вазьыса ӧз вутты, соиз лулӟыса вераз:
- Мискинь тылобурдо… Лумбыт лоба ини…
Мардан корказы пыриз. Кышноез ӝӧк вылэ сиён пуктӥз но куаретытэк палэнскиз. Номыр уг вазьыло пересьмем анаез но, бадӟымез пиез но.
- Мар, оло, ваньмы бӧрдыны кутскомы-а со тылобурдо понна? – ӧз чида ни Мардан.
Нош ик нокин вазись ӧйлась.
Тани мукетыз ӵукна но вуиз. Вураметӥ но бакча бертӥ нош ик кинъёс ке люкаськыса ветло. Соос вадьсын пал тури котыръяське. Марлы оске на со – кин тодэ?
Мардан нош ик нюлэскы кошкиз, турилэн куараезлэсь но гурт калыклэн учкемезлэсь пегӟыса сямен. Озьы ик бер ӝыт гинэ бертӥз. Азьло сямен ик номыртэк, буш киын. Киосыд куалекъяло, сюлэмад весь мар ке зӥбе бере, кыӵе пӧйшуран луоз бен со?..
Уйшор азьын Мардан гурт пумынгес улӥсь Ильялэн укнояз йыгаськиз.
- Мар ветлӥськод таӵе бер, ведон сямен? – ӧссэ усьтыса, лекгес юаз юрт кузё.
Мардан пыриз, вазьыны дӥсьтытэк кӧня ке сылӥз но юаз:
- Кылӥд, дыр, тури сярысь, Илья?
- Кылӥ. Мар бон дауртӥд тон озьы?
- Шӧдтэк шорысь луиз со, уйласа но ӧй вутты.
- Нош малы парзэ но ыбыса уд куштӥськы?
- Шораз пыӵал ӝутыны ӧвӧл, куаразэ но кылыны уг быгатӥськы ни табере. Оло, тон ыбод сое, Илья, а?... Уин нокин но уз адӟы…
- Вот марлы лыктэмед тон! Монэ тон асэныд эн ӵошаты. Охотовед косэмъя, кӧня ке калгись пуныосыз ыби ке, монэ изьверен эн лыдъя. Сьӧлыктэм тылобурдоез быдтыны мынам киы уз ӝутӥськы. Вот озьы, валад-а?
Марданэз Илья коркасьтыз донгаса сямен поттӥз…
Пал тури лобаз куинетӥ нуналаз но. Дырын-дырын шур сьӧрысь арамае васькылӥз. Ӝыт пал со ӵемгес ышылӥз – лябомиз, шӧдске.
Уин тури бакчае ик лэзькиз. Мардан уг изьы вал, со ваньзэ адӟиз, кызьы тури мырдэм гинэ васькиз куасьмем картофка пудъёс вылэ, кызьы пуксиз но соку ик чусомиз.
Солэн матаз вуыса, Мардан толэзь югытын ӵем-ӵем вырись синъёссэ адӟиз на-ай. Ӝоген соос кыниськизы, собере турилэн кузь пыдъёсыз золскизы.
Шокасьтэм тылобурдоез ӝутыса, воргорон шур пала вамыштӥз. Укноосысен туж трос синъёс бӧрсяз учкыса кылизы кадь потӥз солы.
Андрей ГИЛЬМАЕВ.
Читайте нас: