Тужгес ческыт но пайдаё лимон лимонариын будэ

29-тӥ октябре ошмесчиос лимонарие вуылӥзы. Солэсь ӧсъёссэ усьтэм бере ик нырез пӧртэм пумо зынъёс бичатыны кутскизы. Татын юрт пушкын, садъёсын будэтоно будосъёс сяськаясько вылэм. Соос пӧлысь куд-огезлэн емышъёсыз но вань. Синмаськыса учки "Абутилон гибридный" сяськаез. Куке но сое дорамы но будэтӥмы угось. Но малы ке со ноку сомында сяськаеныз ӧз шумпоттылы.

Палэнэгес интыяськемын туспуксьыны яратӥсьёслы сэрег. Татчы егитъёс сюан нуналазы кожылыны ярато, пе. Лимонарийын бадӟым инты висъяське лимонлы. Соосты учкыса чылкак паймод: будосъёсын олокӧня пӧртэм емышъёсыз. Соос пӧлысь куд-огез ӵужектэмын ни, вожъёсыз но вань на. Нош кытын ке тӧдьы сяськаосыз адӟисько на. Лимонъёсын ӵошатскыса будо папайя, банан, королевской стрелитция.

Тӥни кытын будэ вылэм тужгес ческыт но пайдаё лимон. Но, жаляса верано, со магазин ӝажыосамы уз вуы. Лимон басьтыны татчы ик трос калык, пе, вазиське. Ӝоген сое октон борды кутскозы ни.