+9 °С
Салкым
Антитеррор
Вань иворъёс
Пӧртэм-пӧртэм
25 Куарусён 2019, 16:26

Мынам эскеронъёсы

Улонысь суред

Аресэ вань ке но, пудо-живот утьытэк улэме уг поты на. Тылобурдоосы, кроликъёсы но нурскетӥсе вань. Мон соосын вераськыны яратӥсько, куд-ог дыръя тышкаськисько но. Ма, пумитам одӥг кыл но уг вазё ук, котьма вераны луэ.
Азбар котырын берганъям шӧдӥ: кема ӧвӧл базарысь басьтэм курегэ пуксьыны медэ. «Кык курегъёсы пуко ини. Таиз пукиз ке но, тютюосыз бер потозы. Куазь кезьыт луыны кутскиз ке, соос уз будэ. Та курегме одно ик дугдыто», - малпасько ас поннам. Озьы ик лэсьтӥ: кезьыт вуэ поныса басьтӥ но бекчеен кымай. Ортчиз куинь нунал. Курегме пытсэтысьтыз мозмытӥ. Учкисько ке, кучыр-кучыр карыса, бызе ук берен пукем интыяз. Я, ӵок ини, мед пукоз! Анай луэмез потэ, лэся.
Кӧня ке дыр ортчыса, кыкез курегъёсы трос чипы поттӥзы. Нош куинетӥез пуке на. Вуиз кема возьмам нунал! Пи-пи! куара сёто курег улысь тютюос. Уг тодӥськы, кин соос понна золгес шумпотӥз меда: оло курег, оло ачим?
Нунал бӧрьсы нунал ортче. Тани куинь арня бере кылемын. Гурт курегъёсы туж умой утялто пиоссэс, нош базарысь басьтэм инкубатор куреге… Осто! Пиоссэ сиыны но уг ӧтьы, изьытыны улӥяз но уг пырты. Со анаен будэмын ӧвӧл ук, соин пиоссэ утялтонэз уг вала, лэся.
Куинь курегъёсы - куинь пӧртэмесь. Огез али но пиоссэ утялтэ. Кыкетӥез, пиосыз сярысь вунэтыса, атас котырын берга ни. Нош базар куреге тютюоссэ кулэ ик ӧз кары. Секыт луиз-а меда? Оло ас кожад улонлэсь капчилыксэ валаз? Мар луоз ини пиосыныз?
Гажано лыдӟисьёсы, ма вераме потӥз тӥледлы, асьтэос валалоды, дыр.
Лилия ГАРАЕВА.
Татышлы ёросысь Арибаш гурт.
Читайте нас: