+9 °С
Салкым
Антитеррор
Вань иворъёс
Пӧртэм-пӧртэм
13 Куарусён 2019, 18:55

Уромъяськимы вал но...

Нюлэскысь та сюбег гинэ сюрес вылтӥ кылем гужем кӧня ке пол ортчоно луиз. Нырысь кусо ӝутыса, собере саник яке мажес кутыса ветлӥськиз: Уяди шур сьӧрысь кыръёсын турын дасямы уга.

Туж ӝокыт вал соку. Турнано кыр котырысь куакъёслэн саюлзы но ӧз юртты ни угось. Тӥни соин огпол сюрес дурысьгес мӧйы беризь улэ шутэтскыны пукси. Умой-умой интыяськыны дасяськисько вал, йыр вадьсам кин ке куара сётӥз:
- Ӵок-ӵок, ӵок-ӵок…
Выллань учки но – омыретӥ лобись коньылэн быжыз гинэ адӟиськыса кылиз.
Мар ке луэм та пӧйшурлы, малпасько, юнме шорысь ӵашетыса уз ветлы. Палэнэгес мыныса султӥ но син шорам йӧтӥз беризьлэн зӧк ваез улысь гырк. Озьыен, коньы отын улэ.
Кыкетӥзэ татӥ ортчыкум, со беризь улэ юри кожи но тодмо куараез кылӥ:
- Ӵок-ӵок, ӵок-ӵок…
Мон но солэн кылызлы дыши кадь. Табере нюлэскы мыныкум но, гуртэ бертыкум но коньылы вазьылӥсько. Со пумитам куаретэ. Ассэ но ӵем адӟылӥсько ини. Весьлы укшась синъёсыныз туж паймыса кадь учке со. Быжыныз выретэ: марысь-мар ке, соку ик пегӟыны дась. Нош ачиз уг кошкы. Мон вазисько, со но вазе. Мар сярысь вераськиськом, созэ ми асьмеос гинэ тодӥськом, дыр. Эшъяським-уромъяським беризь гыркын улӥсен…
Амалтэк йыре лыктӥзы кылбур чуръёс:
Нуныяськись гурез пумитаны
Коньы ваське улысь вайёс
вылэ.
Нош кышкытсэ уг вуы
шӧдыны –
Лэчыт пуля басьтэ солэсь
лулзэ.
Зэм но, одӥгез нюлэскысь эшъёс утча, кыкетӥез отчы тушмон мылкыдын мынэ.
Андрей ГИЛЬМАЕВ.
Читайте нас: