+18 °С
Салкым
Антитеррор
Вань иворъёс
Пӧртэм-пӧртэм
13 Куарусён 2019, 18:52

Тӧдьыгуби, нингуби...

Губи тазалыклы нокыӵе пайда уг вайы шуо ке но, диетологъёс таӵе верамъёсын соглаш уг луо. «Губиын, уката но куасьтэмаз, сӥльын сярысь куинь поллы, нош курегпузын сярысь кык поллы трос белокез», - пусъё соос. Со сяна, губиос узыр витаминъёсын но фосфорен.

Пайдаё луэмзыя тужгес тӧдьыгубиез, нингубиез но коньыгубиез дунъяло. Мукетъёсыз пӧлысь висъяло на кызьпугубиез (подберёзовик), пипугубиез (подосиновик), вӧёгубиез (маслёнок), курытгубиез (волнушка), кӧсвӧёгубиез (моховик), шыргубиез (сыроежка), мильымгубиез (лисичка), лӥялгубиез (опята), кыедгубиез (шампиньон) но чургубиез (рядовка). Соос пӧлысь кудзэ ке куасьто, кудзэ ке ӵыжатыса, сылалтыса, мариновать карыса сиё. Но ӝушсы, сюлъёссы висемен курадӟись муртъёслы, арлыдо адямиослы, пичи нылпиослы губиез чакласькыса сиыны дэмлало. Малы ке шуоно губиын хитин нимаськись белок вань. Со мугорысь секыт металлъёсты, кырсьсэ (шлакез) поттыны юрттэ. Озьы ке но ӝушын чылкак уг сылмы. Мукет витаминъёслы но мугоре пыӵаны люкетэ. Губилэн куказ хитинэз тужгес трос. Соин ик, пӧзьтыны дасяку, изьызэ сярысь кукъёссэ векчигес юдо. Векчи юдэм губи ӝог пӧзе, дас минут куспын сиыны вуэ. Юдытэк, быдэсак пӧзьтэмез – 20-25 минут.
Нялтас верано на ке, кузё кышноос пӧлысь кудӥз-огез губи миськем вузэс но палэнэ уг кисьтало. Со вуэн кырысь но коркась будосъёссэс мускытатъяло. Будосъёссы, пе, уката зол пушъё.
Читайте нас: