Кызьы утёно картофкаез?

Туэ гужем пӧсь куазен ӧз висъяськы. Зор но трос гинэ кисьтӥз. Секыт луиз асьсэ сад-бакчаоссэс возисьёслы. Картофка будэтӥсьёс, бакча сиёнзы эшшо но тросгес медаз сисьмы шуыса, сое ӝоггес октыны тыршизы. Сюй пушкысь поттылэм картофка быдэс пудэн но бакчае кыльылӥз уго. Туэ, фитофторозэн валче, та бакча сиёнэз кот сисьмон зӥбиз. Та висёнъёс гужем кезьыт но зоро луыку тужгес аляло.

Кызьы утёно будэтэм бакча сиёндэс, со нош медаз сисьмы ни шуыса?

Толэз умой мед потоз шуыса, кельтоно умоесь, вандылӥськымтэ но сисьмыны кутскымтэ бакча сиёнъёсты. Фитофторозлы пумит пӧртэм суретъёсын нюръяськыны луэ, нош кот сисьмонэн висьыны кутскем картофкадэс бакчаысь эн ик пыртэ.

Картофкаез кӧс дыръя октыны тыршиськом. Быгатӥськоды ке, сое кӧня ке кырын возёно, куасьтоно, собере гинэ гуосы яке гулбече интыяно. Вандӥськем картофкадэс нимаз бичалэ. Сыӵеоссэ вазьгес сиыны тырше. Картофкадэс мешокъёсын возёно ӧвӧл, тыршелэ корзинаосы, пластмасс ящикъёсы тырыны.

Картофка возён интыдэс ӵемгес тӧлатэ. +1, +2 градус шуныт умой тол потон понна тырмыт луоз. Сисьмем картофка синйылтӥды ке, соку ик утялтэ, со вӧзын мукетыз сисьмыны кутскоз.

Гудэс картофка октыны кутскытозь толэзьлэсь азьло дасяно: ӵужоно, жагзэ утялтоно. Шыр, комак пырон пасьёс ке шедьтӥды, цемент кисьтэлэ. Собере гудылэсь борддоръёссэ хлорной известен (10 л вулы 400 г) зыралэ. Кӧня ке нунал тӧлатыса возем бере борддорез но выжзэ медной купоросэн сурам известен шобыртоно но арня ӵоже тӧлатоно.

Картофкалэн вань пӧртэм сортъёсыз. Вазь вуисьсэ толлы кельтытэк но яралоз, сое шуркынмон толэзёзь сиыса быдтоно.

Картофкадэс мукет бакча сиёнъёсын огазьын возьыны уг ӵекто. Умой бускель луоз картофкадылы горд кушман, со мултэс дымез басьтоз но картофкадэс сисьмыны уз лэзьы.

Читайте нас:

Учредитель: Агентство по печати и средствам массовой информации Республики Башкортостан

Регистрационный номер: Свидетельство ПИ № ТУ02-01536 от 6 июня 2016г. Главный редактор: Нигаматуллина Оля Борисовна

Газета "Ошмес" - общественно-политическая, социальная, культурно-просветительская газета удмуртов Республики Башкортостан.

Телефон

Телефон+7 (34778) 2-11-89, 2-18-71

Электронная почта

[email protected]

Адрес

452830, Республика Башкортостан, Татышлинский район, с. Верхние Татышлы, ул. Ленина, д. 91