Ог-огдэ гажан медаз быры

Почтае трос калык люкаськем. Тросэз – арлыдоос, соос тыллы, вулы, газлы коньдон тыро.

Ульчаысь бызьыса сямен егит нылаш пыриз. Дугдыса но ӧз улы, чуртнаськыса касса вӧзы вуиз но, лыдъяськыса пукись кассирлы вазиське, мыным, пе, посылка вуымтэ-а. Интернет пыр мар ке но заказать карем вылэм, лэся.

Кассир ужзэ куштыса со дыре ик солэсь посылказэ утчаны кутскоз шат? Час шораз ӵем учкылӥсь нылашлы кин ке жингыртӥз. Матысь эшез, вылды. Кутскиз ук со почта тыр толон егит пияшеныз юмшамез сярысь вераны. Туннэлы кыӵе планъёсыз – ваньзэ но тодӥм. Вераськоназ нылаш урод кылъёсты но ӵем кутэ. Огкылын вераса, ми – черодын сылӥсьёс – витьымтэ шорысь тодмотэм муртлэн улонэзлэсь одӥг люкетсэ тодӥм. Кулэ-а вал со милемлы? Мыным – кулэ ӧй вал. Солэн бадӟым куараен вераськемез кассиръёслы ужаны люкетэ шуыса, нылашлэн йыраз но ӧз лыкты.

Трос калык люкаськоно интыын – вуз карон юртын, эмъюртын, банкын яке автобусын дыръя – телефонэз басьтытэк но луоз, дыр. Яке вераны кулэ, бергес ачим жингырто шуыса. Адями бордын мукетъёсты гажан мылкыд но луыны кулэ ук.